2
Ukuyerekezibwa hiꞌgulu lyoꞌlusiku lwa Nahano
1 Mulasagye ikibuga mu kaaya keꞌSayuni!
Mubandire akashiba ku mugazi gwani mutaluule, gira abandu bayiji lwa.
E batuulaga beꞌBuyuda, mujugume mweshi!
Mukuba, ulusiku lwo Nahano agayiji twa kweꞌmaaja, lukola lugaahika.
2 Yulwo lusiku, luli mweꞌkihulu kya namudidi, lunali lweꞌbibungu bizito.
Aaho! Langiizi ngiisi kweꞌkiso kihamu kyeꞌbizimu kiri mu hika.
Kigweti kigayija ngana, nga kwiꞌzuuba liri mu tunduuka shesheezi.
Yibyo bizimu, biri kandaharuurwa, binali neꞌmisi bweneene.
Yiryo igambo, litazindi boneka, litanâye shubi boneka!
3 Yikyo kiso, umuliro guli mu singoola imbere lyakyo, kiri neꞌnyuma lyakyo.
Ngiisi ho guli mu lenga, hanasigale bwanuula.
Yibyo bizimu, ikyanya bitâli zaazi lenga, ikihugo kyâli riiri kiija ngana ngeꞌndalo yeꞌHedeni.
Haliko, iri bikaba keera byalenga, kyanasigala ngiꞌshamba lya tema-ndime.
Emwe! Ndaahyo íhiri mu fuuka imbere lyabyo.
4 Yibyo bizimu, biri mu boneka nga fwarasi ziꞌzibo,
binali nga fwarasi, mu kuyehuuka mulindi.
5 Ikyanya biri mu simba-simba ku migazi,
ikilundumo kyabyo, kiri nga kyaꞌmagaare giꞌzibo,
kandi iri ngeꞌmbigi zoꞌmuliro úguli mu yigwima mu byasi byumu.
Yibyo bizimu, ikyanya biri mu yija, biryagagi nga kiso kyaꞌbasirikaani, ábagweti bagateera abagoma.
6 Ikyanya abandu bali mu bibona, bali mu gwatwa neꞌkihuumula,
Ngiisi kikebe, kinayami hinduka.
7 Birya bizimu, biri mu teerana ngaꞌbasirikaani.
Binali mu shonera ku nzitiro ngaꞌbasirikaani.
Ngiisi kiguma, kiri mu kizi yitunda imbere, buzira kuyahuka,
8 bitali mu sindikira ibyabo,
Si ngiisi kiguma, kiri mukizi kulikira iyayo-yayo njira.
Biri mu hongola inzitiro zooshi,
ndaanakyo ikyangaki bihangirira.
9 Biri mu kizi shabukira hooshi mu kaaya, binakizi tibitira ku nzitiro.
Binakizi yigogombeka mu nyumba, mu kulenga mu twazo ngaꞌbazimba.
10 Ikyanya biri mu yegeera, idaho liri mu yami jugumba, di-di-di!
Kiri niꞌgulu, liri mu lenga mweꞌkinyukura.
Izuuba noꞌmwezi, binazinge ikihulu,
Kiri neꞌndonde, zinayami zima.
11 Nahano ali mu sholera ikiso kyage, agweti agayiberekania kwiꞌzu.
Yibyo biso, kwo biri bikalage, biri mu músimbaha.
Lulya lusiku lwa Nahano, luli lwaꞌkahebuuza.
Emwe! Luli mu yobohya ngana-ngana.
Aaho! Nyandagi úwangaluyigenderera?
Nahano ahamagala abandu kwo bamúgalukire
12 Nahano adetaga kwokuno: «Bwo muki hiiti ikyanya,
mungalukirage ku mutima gwinyu gwoshi.
Si kikola kyanya kyoꞌkuyishalisa, na kyoꞌkulira, na kyoꞌkujengeerwa.
13 Mutakizi ki daatula naaho ibyambalwa biinyu, mu kuyerekana kwo mukoli jengiirwi.
Si mukizi hindula imitima yinyu.»
Mugalukire Nahano, Rurema winyu.
Mukuba, ali mu yuvwiranwa indengeerwa, anali mu kejererana.
Atali mu yagalwa duba, si ayijwiri urukundo bweneene.
Ayamiri ali ibiringiini ukuyishuhiza ku mabi.
14 Amagambo ga Nahano, Rurema winyu, ndaaye úgayiji.
Hali ikyanya agayishuhiza.
Na ho angamùsiga mwiꞌdaaki, anamùgashaanire.
Haaho, munakizi longa ingano, neꞌbinywebwa,
halinde munabe noꞌbulyo bwoꞌkukizi mútangira mwiꞌtuulo.
Ikyanya kyoꞌkuyishalisa noꞌkuyinginga Rurema
15 Mulase ikibuga mu kaaya keꞌSayuni.
Mumenyeese ikyanya kyoꞌkuyishalisa.
Mulaalike abandu booshi, bakuumane kuguma.
16 Na mango bakuumana, munabayeruuse.
Mukuumanie abashaaja, naꞌbaana, kiri noꞌtulenge.
Kiri na ábakiri bahya, nabo bahuluke mu bisiika byabo.
17 Kiri naꞌbagingi, kwo bali mu kolera Nahano,
nabo bayingire ha kati keꞌkisiika kyoꞌkuyingira mu nyumba ya Rurema, naꞌkatanda kaage.
Ee! Balirage, iri banakizi huuna Rurema, ti:
«E Nahano, si tulyagagi bandu baawe! Aaho! Utukejeerere, we kongwa.
Utanaki tubonie ishoni!
Utanaleke kweꞌbinyamahanga bikizi tuhonyoleza, mbu:
“Aaho! Rurema winyu, ali hayagi?”»
Nahano agagashaanira ikihugo
18 Haaho, Nahano agayuvwirwa abandu baage uluugi, anabakejeerere.
19 Anabashuvye, ti: «Buno, ngolaga ngashubi mùheereza ingano, neꞌdivaayi, naꞌmavuta.
Emwe! Mugayiguta ngana!
Ndagaki shubi mútanga mu binyamahanga,
mbu bashubi mùgayiriza.
20 Balya bagoma ábakalyoka imbembe,
ngabayimula, na mbashendekeze halinde mwiꞌshamba, áhayumagusiri.
Abasirikaani baabo ábali mu tee genda imbere,
ngabalasha mu Nyaaja yoꞌMuunyu.
Na ábali mu yija inyuma, ngabalasha mu Nyaaja Mediterane.
Ibirunda byabo, bigakizi huumura buligo,
halinde lirya ibaya lyabyo linakwire hooshi.»
Ku kasiisa, Nahano akamùgirira ibitangaaza.
21 E bandu baani, mutaki yobohe!
Haliko, mushambaalage, iri munabanda akabuuli.
Mukuba, Nahano akagira amagambo gaꞌkahebuuza.
22 Emwe nyamiishwa, mutaki yobohe.
Mukuba, mu kishuka, umuyonga gugaki mera.
Kiri neꞌbiti, bigatongeka kweꞌbitumbwe.
Imizabibu neꞌmitiini, keera byajoojeka ku bwingi.
23 Na niinyu mwe batuulaga beꞌSayuni, mushambaalire Nahano, Rurema winyu.
Mukuba, agamùyerekana ngiisi kwo ali mwemeera.
Agakizi mùniekeza amahona-nvula, kiri neꞌnvula yoꞌkuyeza.
24 Ibiyeluuliro, bigayaja mweꞌngano bweneene.
Kiri neꞌndango, zigakizi bogoka idivaayi, naꞌmavuta.
25 Nahano adetaga kwokuno: «Ngiisi byeꞌnzige zikasivya, ngola ngamùgalulira byo.
Nyiji kwo mukateerwa neꞌmigunga, neꞌnzige, na banamahingiri, naꞌmahaazi.
Yibyo byoshi, nienyene, nie kabilungika gira biyiji mùteera.
26 Kundu kwokwo, mugakizi lya, munayigute.
Munakizi huuza iziina lyani, nie Nahano, Rurema winyu.
Mukuba, yibyo bitangaaza, nie gweti ngamùkolera byo.
E bandu baani, mutâye ki teezibwe ishoni.
27 Haaho, lyo mugasobanukirwa kwo ndi mu kati kiinyu,
na kwo nie Nahano, Rurema winyu. Ee! Ndaaye gundi.
Ku kasiisa, abandu baani, batâye ki teezibwe ishoni.»