Ikitaabo kyoꞌmuleevi
Yuheeri
Indangiriro
Mu siku zoꞌmuleevi Yuheeri, akanyamwala keꞌnzige, zikayiji teera Abayuda, zanabashereegeza imbuto bweneene. Kwokwo, Yuheeri anabwira yabo booshi kwo batwikire ku byaha byabo. Mukuba Nahano akabwira Yuheeri kwo yizo nzige zikaba kimenyeeso kyoꞌkubakengula kwo akola agahaniiriza Abayuda.
Ku yukwo, Nahano akabwira yabo Bayuda kwo bakizi kuumana imbere lyage, booshi banatwikire ku byaha byabo (1.14; 2.15-16).
Ikyanya yabo Bayuda bâli kizi libuzibwa, banakizi daatula ibyambalwa byabo. Kundu kwokwo, Yuheeri akababwira kwokuno mu 2.13: «Mutakizi ki daatula naaho ibyambalwa biinyu, mu kuyerekana kwo mukoli jengiirwi. Si mukizi hindula imitima yinyu!»
Na kwakundi, Rurema akalagaania abandu baage ku njira ya Yuheeri ngiisi kwo booshi bâye longe Umutima Mweru. Yugwo muhango, gukayiji koleka ku lusiku lweꞌPendekosite.
Mu yiki kitaabo, Yuheeri ayerekiini ngiisi kwoꞌMutima Mweru gugayija. Imiziizi miguma yiꞌsikamiro, iri mu Yuheeri 3.1-2 (Yaga magambo, Peturu anashubi gadeta mu Mikolezi yeꞌNdumwa 2.16-18): «Nahano adetaga kwokuno: “Ha nyuma, nâye yonere Umutima gwani ku bandu booshi. Bagala biinyu na banyere biinyu, bagakizi tanga ubuleevi. Abashaaja biinyu, bagakizi loota ibirooto. Neꞌmisore yinyu, igakizi bona amabone. Mu yizo siku, ngayonera Umutima gwani kiri na ku bakozi, abashosi naꞌbakazi.”»
Íbiri mwo ku bwofi
a) Ikyanya Abayuda bakahanwa, lwanaboneka kwo lwo “Lusiku lwa Nahano” (1.1–2.17)
b) Ku Lusiku lwa Nahano, lyaꞌBayuda bagakizibwa (2.18–4.21)
1
1 Nahano akabwira Yuheeri, mugala Petweri kwokuno:
Imbuto zashereera hiꞌgulu lyeꞌnzige noꞌkukena invula
2 E bashaaja! Muyuvwirize!
Mwe batuulaga booshi beꞌBuyuda, mutegage amatwiri!
Aaho! Mu siku ziinyu, kandi iri mu za bashokuluza biinyu,
igambo mwene lino, ka keera likakoleka?
3 Yiri igambo, muliganuulire abaana biinyu.
Nabo, bakaliganuulire abaana baabo.
Ee! Yiri igambo, mukakizi yiji liganuula mu bibusi byoshi!
4 Ngiisi mbuto ízikasigwa neꞌmigunga, zanaliibwa neꞌnzige.
Na ízikasigwa neꞌnzige, zanaliibwa na banamahingiri.
Na ízikasigwa na banamahingiri, zanaliibwa naꞌmahaazi.
5 Mwe mulalusiri! Muvyukage, munalire ku kimombo!
Mweshi mwe muli mu laluka idivaayi! Mukizi bululuka.
Imizabibu yoshi, keera yasherebera,
kyo kitumiri mutâye ki nywe ku divaayi nunu-nunu.
6 Ikihugo kiinyu, keera kikateerwa naꞌkanyamwala keꞌnzige.
Yizo nzige, ziryagagi kandaharuurwa.
Amiino gaazo, gali nga mihenga yeꞌndare,
kandi iri nga migeka yeꞌndare yiꞌbuguma.
7 Zirya nzige, keera zikateera imizabibu yitu,
Zanashereeza neꞌbiti biitu byeꞌmitiini.
Zanakizi bibunga, iri zinagimogolola ibyula byayo.
Zanasiga amatavi gaabyo meeru-meeru.
8 Kwokwo, mulirage!
Mukizi ba ngoꞌmunyere úgweti úgabululuka mu kigandaaro kyeꞌshasha yage.
9 Mu nyumba ya Nahano, abandu batakiri mu leeta amatuulo goꞌmushyano, kandi iri geꞌdivaayi.
Kyo kitumiri abagingi, balya bakozi ba Nahano, bakola mu lira.
10 Indalo, keera zasiba. Niꞌdaho keera lyayumaguka.
Ingano, neꞌdivaayi, kiri naꞌmavuta, byoshi byahumbuluka.
11 E bahiizi! Muvunikage indege!
Kiri naꞌbalaazi beꞌmizabibu, mugire mubululuke.
Ingano noꞌbulo, byapiisibwa!
Imimbu yoshi ya mu ndalo, keera yashereera.
12 Imizabibu, keera yahangalala.
Neꞌmitiini, keera gayumaguka.
Ibiti byoshi byeꞌbitumbwe, keera byayuma.
Kyanatuma abandu bataki shambiiri.
Abandu balaalikwa ukuyishalisa
13 Na niinyu, e bagingi! Muyambalage ibyambalwa byoꞌkugandaara.
Mwe mugweti mugaakola ha katanda ka Nahano, mulirage.
Mwe mugweti mugakolera Rurema, mulaale muyambiiti amasuuzu.
Mukuba abandu, ndaakiryo ituulo lyoꞌmushyano kandi iri lyeꞌdivaayi bakiri mu tanga mu nyumba ya Rurema.
14 Yumwo mu nyumba yage, mumenyeesanie ikyanya kyoꞌkuyishalisa.
Mukuumanie abandu booshi, kuguma naꞌbashaaja.
Yabo booshi, mubakuumanie ha nyumba ya Rurema, Nahamwitu.
Neꞌkyanya bagaahika, munatondeere ukumútakira!
Ulusiku lwa Nahano
15 Lulya lusiku lwa Nahano woꞌbushobozi bwoshi, keera lwayegerera,
Lunali lusiku lwo agayiji shereeza kwo.
Lulya lusiku, lugaleeza abandu mweꞌkihuumula.
16 Ibyokulya biitu, bigweti biganyerera mu masu giitu.
Inyumba ya Rurema, itanakiri mweꞌsiku zoꞌkumúshambaalira.
17 Kundu tukabyala imbuto, haliko, zayumira mwiꞌdaho.
Ibihinda, bikoli sigiiri bimaata peperege!
Ibitunda byoꞌkusingulira mweꞌmbuto, keera byahongoka.
Ingano yamala ngana-ngana!
18 Yuvwirizi ngiisi kweꞌbitugwa bigweti bigaborooga.
Ingaavu, zigweti zigayifuka iyo munda neꞌyo munda, hiꞌgulu lyoꞌkubula indagiriro.
Kiri neꞌbibuzi neꞌmbene, bigweti bigalibuuka!
Umuleevi atakira Nahano
19 E Nahano! Uyiji tutabaala, maashi!
Si mwiꞌshamba, umuliro keera gwasingoola indagiriro zooshi.
Kiri na mu ndalo, imbigi keera zajigiivya ibiti byoshi.
20 Kiri inyamiishwa, zigweti zigakutabaaza,
bweꞌnyiiji zikoli kamiri lwoshi!
Kiri na mu kishuka, umuliro gwayami singoola ibyasi.