2
1 Uyo Yona, Nahano âli shungisiri kwo bitaatalwe woꞌlufwi, agamúmira. Neꞌri akaba keera amúmira, Yona anahisa isiku zishatu, ubushigi niꞌzuuba, ali mwomwo mu nda yage.
Yona ahuuna Rurema wage
2 Uyo Yona, iri akaba akiryagagi mu nda yoꞌyo bitaatalwe woꞌlufwi, anatondeera ukuhuuna Rurema Nahamwabo, ti:
3 «E Nahano, ikyanya nâli kola mu makuba, nꞌgakutabaaza,
wanayami nyuvwiriza.
Nꞌgakubululukira ukulyokera i nakwere, wananyuvwa.
4 Si we wâli mali nyulubiza mwiꞌbenga, ha kati keꞌnyaaja!
Amiiji mingi, gananzokanana.
Imidunda yanakizi ndenga-ndenga kwo.
5 Nanatondeeraga ukusalira kwo wambindulira ingoto,
halinde ndaki bone inyumba yawe nyeeru!
6 Yago miiji gakahambiri nvumba umuuka.
Yiryo ibenga, lyâli loziizi ukuyami nyulubiza lwoshi-lwoshi.
Kiri neꞌbyasi bya mu nyaaja, byanakizi nyizingira-zingira kwiꞌtwe.
7 Nâli mali manukaga, halinde iꞌdako ku ndaliro zeꞌmigazi.
Nâli shwesirwi mu kihugo kya abafwiri.
Inyiivi zâli mali mbamikirwa, gira mbeere yo imyaka neꞌmyakuula.
E Rurema Nahamwitu! Kundu nâli kola mu miiji mingi,
halikago, wananyulubula, wanandyosa yo, ngiri mugumaana.
8 E Nahano, iri nꞌgabonaga kwo ngola ngaafwa, nanakukengeera.
Nanayami kutabaaza, kwo uli mu nyumba yawe ndaluule.
9 Abandu baguma bagweti bagayikumba imizimu ya kabusha-busha.
Mu kugira kwokwo, bali mu yibuliisa imigashani.
10 Si niehe, ngakizi kuyivuga ku nyimbo,
na ngutangire amatuulo goꞌkusiriiza.
Ngiisi byo nꞌgakulagaania, ngabikola.
Mukuba, we Nahano, we mu tukiza.»
11 Yona, iri akayusa ukudetaga kwokwo, Nahano anakyula kwo ulya bitaatalwe woꞌlufwi amúshalire i bulambo. Lyeryo, anayami gendi múshalira yo.