Ikitaabo kyoꞌmuleevi
Yona
Indangiriro
Yiki kitaabo kikayandikwa na Yona, kinayerekiini ngiisi kwo Rurema asiimiri abandu booshi, kiri naꞌbagoma.
Haliko uyo Yona, yehe âli shombiri abandu beꞌNinaawi, bwo bâli bagoma balangi. Kwokwo, ikyanya Rurema akamúbwira kwo agendi bakengula, analahira, anagira mbu ayikondeere hala mu nyaaja. Kundu kwokwo, anayiji mirwa na bitaatalwe woꞌlufwi, na ha nyuma lyeꞌsiku zishatu, anamúshalira i bulambo.
Leero, uyo Yona anagendi kengula abandu beꞌNinaawi, banayami yilega ibyaha byabo. Kundu kwokwo, atanasiima, anashubi yagalwa imbere lya Rurema.
Muziizi muguma gwiꞌsikamiro, guli mu Yona 4.11: «Haliko yaka kaaya keꞌNinaawi, lolaga kwo kali kahamu bweneene! Kali mwaꞌbandu ingingwe yeꞌbihumbi igana na makumi gabiri. Yabo booshi, batasobanukiirwi neꞌbiija neꞌbibi. Mulyagagi neꞌnyamiishwa nyingi kwakundi. Aahago! Ka bitashubi ngwaniini kwo nyuvwirwe abandu baako indengeerwa?»
Íbiri mwo ku bwofi
a) Rurema abwira Yona kwo akengule Abaninaawi (1-2)
b) Yona agendi kengula Abaninaawi (3)
c) Yona ashubi bona buligo (4)
1
Yona atibita Nahano
1 Lusiku luguma, Nahano akabwira Yona mugala Hamitaayi kwokuno: 2 «Yimuka duba, ugende mu kaaya kahamu keꞌNinaawi, unababwiririre kwo bakola bagaahanwa. Mukuba, bakoli bihuusiri bweneene!»
3 Yona, kundu akabwirwa kwokwo, halikago, anamanukira mu kaaya keꞌYopa, anagwana amashuba goꞌkugenda i Tarasisi. Kwokwo, anagashona mwo, gira atibite Nahano.
Ibinyamahanga byateeza Yona ishoni
4 Yago mashuba, ikyanya gâli kizi genda mu nyaaja, lyeryo ngana Nahano anayami vyula ikihuhuuta kikayu bweneene. Irya nyaaja yanabirinduka bweneene, halinde galya mashuba ganahambiri janganuka. 5 Abashooji baago, bâli koli yobohiri bweneene. Kyanatuma ngiisi muguma wabo agatondeera ukutakira ngiisi ye ali mu yikumba imwabo. Banalooza ukuyanguhya amashuba, kyanatuma bagavugumula imiteekerwa yoshi mu nyaaja.
Si Yona yehe, âli koli manukiiri iꞌfwo mu mashuba. Anâli mali gwatwa niꞌro lyaꞌkahondo-hondo.
6 Kwokwo, umukulu waꞌmashuba anamúgendera, anamúbuuza: «Ewe! Kutagi kuno uyigwejeriiri? Vyuka, maashi! Naawe, uhuune ye uli mu yikumba! Hali ikyanya angatubonera ulukogo, anatufuuse.»
7 Iri hakatama, balya bakozi banabwirana: «Muleke tubuuzagye kyula, tulonge ukumenya ngiisi úwatuyingiza mu buno buhanya.» Neꞌri bakabuuza, ikibare kyanagwata Yona.
8 Lyeryo, banamúbuuza: «Utubishuuke, maashi! Biki byo wagira, mu kutukululira yiki kihuhuuta? Aaho! Uli mu gira mukolwa muki? Na buno, walyoka hayi? Ikihugo kyawe, kiryagagi kihi? Abandu beꞌmwinyu, bali banyandi?»
9 Yona, ti: «Niehe ndi Muheburaniya. Na ndi mu yikumba Nahano, Rurema wa mwiꞌgulu. Ye kabumba inyaaja, niꞌdaho. 10 Halikago buno, ngoli gweti ngamútibita.»
Yabo bandu, mbu bayuvwe kwokwo, banahuumirwa ngana, banashubi múbuuza: «Bikagi byo wahanya?»
11 Irya nyaaja yanakaviiriza ukukundula, kyanatuma bagashubi múbuuza: «Aaho! Kutagi tugire, halinde iyi nyaaja ituuze?»
12 Na wa Yona, ti: «Munyabiire, munangabulire mu nyaaja. Haaho, lyeꞌgatuuza. Mukuba, nyiji kwa íbitumiri twalonga kino kihuhuuta kyeꞌngunguula, biryagagi hiꞌgulu lyani.»
13 Balya bakozi banayihangaana mu kushooja, balole iri bangagendi yezeka kwiꞌbuga, shoobe! Mukuba, irya nyaaja ikakaviiriza ukukundula.
14 Ubuzinda, banabwira Nahano kwiꞌzu lihamu kwokuno: «E Nahano, twakuyinginga, we kongwa! Ka ugatubindikira, mbu bwoꞌyu mundu ahuba? Aaho! Ikyanya tugamúkabulira mu nyaaja, utatulege mbu twayita umundu muzira mahube. E Nahano! Yibyo byoshi, ngiisi kwo byakoleka, si wenyene ushubi bishungisiri!»
15 Kwokwo, banagwata Yona, banamúkabulira mu nyaaja. Irya nyaaja, kundu yâli gweti igakundula bweneene, haliko lyeryo yanayami tuuza, shwaa!
16 Yabo bashooji, mbu babonage kwokwo, banatondeera ukuyoboha Nahano bweneene, banayami mútangira ituulo, banalagaania kwo bagakizi múkolera.*1.16 Mataayo 12.40.