Ikitaabo kyoꞌmuleevi
Hobadiya
Indangiriro
Ikitaabo kya Hobadiya kihiiti ikigaajo kiguma naaho. Kikayandikwa ku kyanya akaaya keꞌYerusaleemu kâli mali shereezibwa mu mwaka 586 Kirisito átazi butwa. Ku bwofi, kiyerekiini ubuligo bwaꞌBahedoomu. Mukuba, ikyanya Abahisiraheeri bakatwalwa imbohe i Babeeri, yabo Bahedoomu banakizi bahonyoleza, ti niino! Na kwakundi, banayiji shahula ibindu byaꞌBahisiraheeri.
Kwokwo, yabo Bahedoomu, kundu bâli yiyuvwiti kwo ndaaye úwangabateera mu nzitiro zaabo, haliko ubuzinda, banayiji minikwa lwoshi-lwoshi.
Muziizi muguma gwiꞌsikamiro, guli mu Hobadiya 10: «Íbitumiri mugateteerwa neꞌshoni, munaminikwe halinde imyaka neꞌmyakuula, bwo mukateera beene winyu ba mu mbaga ya Yakobo.»
Íbiri mwo ku bwofi
a) Ngiisi kwaꞌBahedoomu bagaahanwa (1-14)
b) Ulusiku lwa Nahano (15-21)
1
1 Gano mabone, Rurema Nahamwitu akagayigulira Hobadiya, ganaloziri abandu beꞌHedoomu.
Nahano amenyeesa kwaꞌBahedoomu bagashereezibwa
Keera tukalonga indumwa ukulyoka imwa Nahano,
nga kwo akagituma mu binyamahanga, ti:
«Yimuki! Tugendi teera Abahedoomu.»
2 NaꞌBahedoomu boonyene, Nahano anababwira, ti:
«Mu mahanga gooshi, mwehe mwe ngatindimaza.
Mwe mugakizi tooherera, mwe muganakenekwa bweneene.
3 E Bahedoomu, si mwayibona, mbu bwo mutuuziri mu maala ga mu migazi,
na bwo muyubasiri inyumba ziinyu áhayinamusiri bweneene.
Mugweti mugayikangaata, ti: “Nyandagi úwangatushungulula hano?”
Kundu mugweti mugaadeta kwokwo, si mutebesiri!
4 Na kundu mugweti muganunga nga nyunda,
munagendi yubaka ingisha ziinyu hiꞌgulu bweneene, halinde ku ndonde,
haliko, ngaki mùshungulula yo!
Kwokwo, kwo nie Nahano ndesiri.
5 Abazimba kandi iri banyazi, nga bangamùhandira bushigi,
si bangamùnyaga ibindu byoshi byo baloziizi, banamùsigire ibindi!
Kiri naꞌbimbuzi beꞌmizabibu, nga bangamùyingirira mu ndalo, si bali mu siga yaꞌbakeni bangashondooza.
6 Haliko mwe biꞌkondo lya Hesahu, ibindu biinyu byoshi bigashahulwa ngana-ngana!
Kundu mwangabisha ibihinda, bigabishuulwa.
7 Abaami bo mushuba mu kizi tabaalanwa keera bamùhinduka,
banamùyimula mu kihugo, kinali kyeꞌmwinyu.
Bagweti bagamùhenduula, iri banamùvindagaza.
Kundu mushuba mu lyanwa akaholo naꞌkaduutu,
si keera bakamùtega imitego, mutanamenya.
8 Nie Nahano nadetaga kwokuno:
Ku yikyo kyanya, ngaminika abitegeereza booshi ba mu kihugo kyeꞌHedoomu.
Na kundu bangaba batuuziri hala mu migazi,
ndaaye mushosi mwitegeereza, ye ngaasiga mwo.
9 E kaaya keꞌTemaani! Indwani ziinyu zigasigali huumirwa.
Abandu booshi ábatuuziri mu migazi yinyu, bagayitwa.»
Íbitumiri Abahedoomu bahanwa
10 «Íbitumiri mugateteerwa neꞌshoni, munaminikwe halinde imyaka neꞌmyakuula,
bwo mukateera beene winyu ba mu mbaga ya Yakobo.
11 Ikyanya ibinyamahanga bikayingira i Yerusaleemu,
byanashahula yeꞌbindu byoshi,
byanabigabaana mu kutaara ikibare.
Ku yikyo kyanya, mwanayisunga hala naaho, mwanayigira nga muguma waꞌbagoma.
12 E maashi Bahedoomu! Ikyanya mukabona kwo beene winyu bahanyagala,
si mutâli kwaniini ukubahonyoleza!
Kundu kwokwo, ikyanya bakashereezibwa, mwanashambaala ngana-ngana!
Neꞌkyanya bâli gweti bagalibuzibwa, mukabashekeereza.
13 Neꞌkyanya bakalonga ibala, mukayami yifunda mu kaaya kaabo.
Kundu bâli gweti bagashambuuka, mwanashubi gendi baloleera.
Beene winyu bakayiji shahulwa ibindu byabo.
Aahago! Kituma kiki niinyu, mukayiji binyaga?
14 Si mukagendi bayitega ha mashangaaniza,
lyo ngiisi ábagafuuka, mulonge ukubayihoola.
Neꞌkyanya bakatibita yubwo buhanya,
balya ábakasigala, mukabatanga mu bagoma baabo.
15 Aaho! Ulusiku keera lwayegerera, lwo nie Nahano ngaahana kweꞌbinyamahanga byoshi.
Ku yukwo, ngiisi kwo mukagirira Abahisiraheeri, kwo na niinyu mugagirirwa.
Imikolezi mibi yo mukabagirira,
yoshi igatibukira ku matwe giinyu.»
Abahisiraheeri bahima Abahedoomu
16 «E Bahisiraheeri, ikyanya mwâli ki tuuziri ku mugazi gwani mutaluule,
nꞌgamùnywaniisa ku rusoozo lwoꞌburaakari bwani.
Si leero, ibinyamahanga, byo bigakizi lunywera kwo.
Bigalunywera kwo bweneene, halinde binalaluke.
Noꞌbuzinda, binazimiire lwoshi-lwoshi.
17 Mu bandu baani, baguma bagafushukira ku mugazi Sayuni.
Ho hagashubi ba handu haani heeru.
Abandu ba mu kibusi kya Yakobo bagashubi galukira mu kihugo kyabo.
18 Ku yikyo kyanya, Abahisiraheeri bagaaba nga muliro úguyasiri.
Bagasivya abandu beꞌmbaga ya Hesahu lwoshi-lwoshi, nga kishuka.
Ndaaye kiri woꞌmuti úgasigala.
Kwokwo, kwo nie Nahano ndesiri!»
19 Abandu boꞌluhande lweꞌkisaka kyeꞌBuyuda, bagagendi gwata imigazi yeꞌHedoomu.
Naꞌbandu ba ku higangazi bagagendi gwata ikihugo kyeꞌBufirisiti.
Ee! Bagagendi gwata iporoveesi yeꞌHifurahimu, na yeꞌSamariya.
Beene Binyamiini nabo, bagagendi gwata iporoveesi yeꞌGiryadi.
20 Abahisiraheeri ábakoli tuuziri i buhungiro,
bagayiji gwata ikihugo kyeꞌKaanani, halinde i Sarepeta.
Ngiisi ábakalyoka i Yerusaleemu banahungira imbande zeꞌmbembe,
bagashubi galukira mu twaya tweꞌkisaka, i Negebu.
21 Indwani zaꞌBahisiraheeri zigaahima, zinashonere ku mugazi Sayuni,
banagendi twala imigazi yeꞌHedoomu.
Nahano yenyene, ye gaaba mwami wabo!