4
Uburaakari bwa Rurema bwahooha
Inooro, kundu ishuba njukiirize, inashubi keyengiini,
halikago keera yakulubuka.
Kiri naꞌmabuye ágakeyengiini ga mu nyumba ya Rurema,
keera gakashaabulwa bwalaafwe mu njira zaꞌkaaya.
Abaana beꞌSayuni bashuba mu huuzibwa,
mbu bo bali neꞌkishingo ukuhima inooro muguuhya.
Halikago, buno bakola mu gayirizibwa
nga birugu biꞌbumba bizira kishingo.
Kiri na banyambwe mu kuyoza abaana baabo, bali mu batega amabeere.
Haliko abandu baani boohe, ubulangi bubaleeziri.
Bali mu bajajaaka nga kulya kwaꞌkanyuni hotiriishe mwiꞌshamba.
Yabo bandu baani, abaana baabo baanuke, bakoli nyotiirwi bweneene,
halinde indimi zikola mu naniira ku lubanga.
Na kundu bagweti bagahuuna imikate,
si ndaaye úli mu baheereza yo, mbu bashaluuke.
Yaho kare, balya bandu baawe bâli kizi yambala imirondo yoꞌmulimbo,
banâli kizi lya ibyokulya binunu-binunu.
Halikago zeene, bakoli shalisiri mu njira,
banakola mu genda bagalooza ibyokulya i matongo.
Abandu beꞌSoodoma bâli koli bihuusiri,
kyanatuma bagashereera buzira kulonga woꞌkubafuusa.
Kundu kwokwo, abandu baani yo haahe, amabi gaabo go gakolaga mingi bweneene!
Abaluzi beꞌSayuni, bâli yeruusiri ukuhima ulugungu.
Bâli riiri beeru pepeepe, ukuhima amata.
Amagala gaabo, gâli lakusiri ukuhima amabuye miija geꞌsafiiri,
banâli nonosiri ngana-ngana!
Halikago buno, amalanga gaabo, gakoli yulubiiri, ganakola miiru-miiru, ukuhima amakala.
Ikyanya bali mu lenga mu njira, ndaaye úwangaki bamenya.
Uluhu lwabo, keera lwananiirana naꞌmavuha.
Keera lwanayumaguka nga lushaali.
Balya bandu, ho bangafwa noꞌmwena,
buli bwija bayitwe ku ngooti.
Ikyanya umundu ali mu fwa noꞌmwena,
ali mu fwifwitira luto-luto, mu kubula byo agaalya.
10 Bamaawe, kundu bayijwiri urukundo,
halikago, mu kulooza byo bagaalya, bâli kizi deeka abaana baabo.
Ku kyanya abandu bâli hanyagiiri hiꞌgulu liꞌzibo,
yabo banyina banakizi balya, gira balonge ukuba ho.
 
11 Ikyanya Nahano âli koli shavwiri,
anayami mwagula uburaakari bwage mu bandu baage.
Anayasa umuliro mu kaaya keꞌSayuni,
kanajigimba, halinde ku ndaliro zaako.
12 Mu kihugo, ndaaye mwami úwangayemiiri
kwaꞌbagoma bangayingira mu Yerusaleemu mu kulenga kwiꞌrembo.
13 Na íbitumiri bakalongaga ukuyingira mwo,
bwaꞌbaleevi naꞌbagingi baamwo bâli kizi yidulumbika mu byaha,
mu kukizi yita abandu bazira buhube.
Kyanatuma akaaya kagasigala kayulubiiri.
14 Bwo yugwo muko gwâli mali bayulubaza,
kyanatuma bagakizi jeba-jeba mu njira nga mbumi.
Ndaanaye úkagira mbu ahume kiri ku byambalwa byabo.
15 Ikyanya bâli kizi lengaga, abandu banakizi bafuka akahoogo, ti:
«Muyiyeeke! Si bakoli yulubiiri! Muyiyeeke maashi, mutabahume kwo!»
Kyanatuma bagashaaga yaho, banatibitira mu mahanga.
Neꞌyo munda, banakizi jeba-jeba,
ndaanaye úkabahanguula kwo babeere yo.
16 Nahano yenyene ye kabashaabula,
atanaki looza ukushubi balola kwo.
Kwokwo, yabo bagingi, abandu batanakizi ki bagingika,
kiri naꞌbashaaja batanakizi ki simbahwa.
 
17 Twâli kizi langiiza,
tulole iri abandu beꞌkindi kihugo bangayiji tutabaala,
kundu tukalangiiza bweneene,
ndaabo ábakaboneka.
18 Bitanazigaga kwo tutungaane mu njira ziitu,
bwo twâli yobohiri kwaꞌbagoma bagatuyitira mwo.
Ulwitu, lwâli kola lugaahika.
Twâli kola tugaahera ngana!
19 Emwe! Abagoma bâli kizi tulandiriza bweneene.
Bâli mulindi-mulindi nga nyunda, wa vwi!
Iri twâli kizi tibitira mu migazi, banatugwane mwo.
Neꞌri twâli kizi gendi yibisha mwiꞌshamba, banayiji tutega mwo.
20 Kiri na mwami witu, naye akagwatwa mu mutego gwabo,
anali ye Nahano akataluula, ye twanâli langaliiri.
Uyo mwami, twâli toniri kwo ye gakizi tulanga neꞌgindi milala yoshi.
 
21 E bandu beꞌHedoomu, mwe mutuuziri mu kihugo kyeꞌHuuzi!
Kituma kiki mugweti mugashambaala?
Si kiri na niinyu, mugaki nywa ku rusoozo lwoꞌburaakari bwa Nahano!
Neꞌkyanya mugalunywera kwo, mugalaluka,
halinde banamùhogole imirondo, munasigale bukondwe.
22 E bandu beꞌSayuni! Si keera mukahanwa,
munakoli ba baja hiꞌgulu lyeꞌbyaha biinyu!
Kundu kwokwo, buno mukolaga mugalyoka yo.
Halikago mwe bandu beꞌHedoomu, nanga!
Mwehe, Nahano agaki mùhaniiriza hiꞌgulu lyeꞌbyaha biinyu.
Ee ma! Yibyo byaha biinyu, agaki bibishuula!