3
Ikihano kyahinduka ukuba mulangaaliro
1 Nahano keera andakarira,
anambimbula bweneene neꞌngoni.
2 Keera akanyimulaga imbere lyage, anambiika mu kihulu namudidi.
Umulengeerwe, ndaakigwo!
3 Anali mu shiiba agweti agakoleesa ukuboko kwage
mu kukizi ndimbagula.
4 Nahano keera anjaavya, nanahuguta.
Kiri naꞌmavuha gaani, agahooja.
5 Na bwo âli kizi ndeera, iri anandibuza,
kyanatuma ngoli shengusiri.
6 Akambwataza mu kihulu,
nga bandu ábakafwa kare.
7 Akanzokanania uluzitiro, gira lyo ndashaage mwo,
anangona neꞌmigufu mizito.
8 Kundu nâli kizi yamiza mu kumútabaaza,
si amahuuno gaani, atakagatwaza.
9 Akambangirira, mu kumbiikira uluzitiro lweꞌmikungubwe, gira ndalenge mu njira.
Na kwakundi, akambushiisa ikirari.
10 Nahano âli yibishiri ha butambi lyeꞌnjira, nga dubu, kandi iri nga ndare,
gira akayiji ndeera.
11 Neꞌkyanya akambabura mu njira, anayami njanganula,
ananziga yaho buzira butabaazi.
12 Akafwora umuheto gwage,
gira akizi njunguusa kweꞌmyambi.
13 Yoho wee! Nahano, akahambuula imyambi yage yoshi,
anagindungaania mu mafiko.
14 Abandu baani booshi, bâli kizi njekeereza.
Banakizi shiiba bagweti bagambonyoleza, wa honyo!
15 Emwe! Agweti agandibuza bweneene,
Isiku zaani ziyijwiri amalibu makayu naaho.
16 Keera akanvungula amiino, mu kungajiisa ulushegebwe,
anakizi ndibata-ndibata mu luvu.
17 Akambuliisa umutuula,
halinde nanayibagira amalega.
18 Nanadetaga kwokuno: «Si ngiisi byo nâli langaliiri imwa Nahano, keera bikateereka!
Ndaki yifwijiri kwo mbe ho!»
19 Ndi mu kengeera ngiisi kwo ngola mu yangaara, iri na ndibuzibwa.
Ukubikengeera kuli mu ndeetera ubululu bwingi.
20 Yaga malibu gooshi, ndâye gayibagire!
Umutima gwani, gukoli shengusiri ngana-ngana!
21 Kundu kwokwo, hali igambo liguma lyo ngi kengiiri,
linali lyo litumiri ngiri noꞌmulangaaliro.
22 Urukundo lwa Nahano lutali mu heka.
Na bwo atukuuziri bweneene, tutazi mirwa lwoshi-lwoshi.
23 Ee ma! Nahano atuula-tuula ali mwemeera ngana.
Amiija gaage, gali mu ba mahyahya ngiisi shesheezi!
24 Ndi mu yibwira kwokuno: «Ngiisi íbiri byeꞌmwa Nahano, ngaki bihyana.
Kyo kitumiri ngakizi múbiika kwoꞌmulangaaliro.»
25 Iri abandu bangabiika Nahano kwoꞌmulangaaliro, banabe bagweti bagamúlooza ngana,
ali mu bagirira amiija.
26 Kwokwo, buli bwija kwo tukizi tuuza,
mu kulindirira kwo agatukiza.
27 Bunali bwija, umundu ayemeere ukuyigenderera,
ku kyanya akiri musore.
28 Akizi yika haashi, iri anatuuza,
bwo Nahano yenyene, ye mu múbetuza umuteekerwa gwage.
29 Uyo mundu, akwaniini ayilambike haashi mu luvu.
Mukuba, hali ikyanya hangabiiri hakiri umulangaaliro.
30 Ikyanya umundu agweti agamoterwa mwiꞌtama liguma, akwiriiri atege neꞌlyabo.
Neꞌkyanya bali mu mútuka, akizi tuuza naaho.
31 Mukuba, Nahano atagayama amújandiriiri imyaka neꞌmyakuula.
32 Kundu angamújengeeza, si akiri mu múyuvwirwa ikimino.
Ayamiri amúkuuziri bweneene, buzira kumúlekeerera.
33 Atanali mu siima kwo akizi libuza abandu,
kandi iri akizi bajengeeza.
34 Imbohe za mu kihugo, ikyanya bali mu kizi zivindagaza,
Nahano ali mu ba abwini-bwini.
35 Abwinagi neꞌkyanya bali mu yimwa ukuli kwabo kwo Rurema úli hiꞌgulu lya byoshi abaheziizi,
36 neꞌkyanya abagoma bali mu shobania amagambo gaabo imbere lyaꞌbatwi beꞌmaaja.
Yago gooshi, Nahano agabwini-bwini.
37 Ndaaye úwangadeta mbwiꞌgambo liguma likoleke,
Nahano yenyene átazi kyula kwo libe ho!
38 Amabi naꞌmiija, byombi biri mu koleka naaho,
ku buhanguule bwa Rurema úli hiꞌgulu lya byoshi!
39 Aahago! Twe bandu ngana, ikyanya tuli mu hanwa hiꞌgulu lyeꞌbyaha biitu,
ka twangaki yidodombera Nahano? Nanga!
40 Si tukizi loleekeza ngiisi byo tuli mu gira,
tunakizi galukira Nahano.
41 Tukizi gololera amaboko giitu imwa Rurema úli mwiꞌgulu,
iri tunamútabaaza ku mitima yitu yoshi kwokuno:
42 «E Nahano, tukakuyihindulira ngana-ngana, twanakizi huba imbere lyawe.
Yago gooshi, uki gakengiiri.
43 «Kyo kitumiri uki rakiiri hiꞌgulu liitu, unakola mu tulandiriza,
wanatuminika, buzira kutukejeerera.
44 Uki bishamiragi mu kibungu,
mbu utayuvwe amahuuno giitu.
45 Ewe! Si keera ukatukabulira ngiꞌdavwangira.
Mu gindi milala, tukola ngiꞌjolera naaho.
46 «Abagoma biitu booshi, bagweti bagatufuka akahoogo.
47 Keera twagwatwa mu mubashu, tunakoli humiirwi,
tunakoli shereezibwi lwoshi-lwoshi!»
48 Bwaꞌbandu baani keera bakaminikwa,
imigenge ikola mu vubuka mu masu gaani.
49 Iyamiri iri mu hunguluka, itanâye kame,
50 halinde Nahano úli mwiꞌgulu alangiize haashi, anatubone.
51 Ikyanya ndi mu bona ngiisi kwaꞌbakazi beꞌYerusaleemu bakola mu libuzibwa,
umutima gwani guli mu shenguka ku mwizingeerwe.
52 Abagoma baani, kundu ndaabwo buligo nꞌgabagirira,
halikago bagambiiva nga kanyuni.
53 Emwe! Bakandibulira mu kishimo ngiri mugumaana,
banatondeera ukundunda kwaꞌmabuye.
54 Amiiji ganayami nzooka itwe,
kyanatuma ngayiganyira kwokuno: «Yoho wee! Ulwani, leero lwamalaga!»
55 E Nahano! Ikyanya nâli kola mu kishimo,
nꞌgakuberangira kwo undabaale.
56 Nâli gweti ngakutakira kwokuno:
«Unyuvwirize, we kongwa! Si ngweti ngakulirira, mu kukutabaaza!»
57 Ikyanya nꞌgakutabaaza, ukanyegeera,
wanayiji mbwira kwokuno: «Utayobohe!»
58 E Nahano! We kola mu mbulanira,
keera wanangiza mu lufu.
59 Ikyanya bâli kizi ngirira buligo, wanabubona.
Aahago! Undwire ulubaaja mu kati koꞌkuli.
60 Ikyanya abagoma baani bâli kizi ngirira amagambi mabi,
ukagabona gooshi.
61 E Nahano! Ikyanya bâli kizi nduka, ukayuvwa!
Unayiji bwija ngiisi kwo bâli kizi njungikira amabi.
62 Yabo bagoma baani, bali mu shiiba mulege-rege gwoshi,
bagweti baganyimomootera, iri banangamba.
63 Ubalolage kwo, maashi! Si bali mu shiiba baganyamiriza naaho,
kuba ku kyanya babwatiiri, kandi iri bayimaaziri.
64 E Nahano! Ubanyihoolerage,
ukukulikirana naꞌmabi gooshi go bakangolera.
65 Uyumuusagye imitima yabo,
halinde amadaaki gaawe gakizi batibukira kwo.
66 Ikyanya ugaaba ukoli barakariiri, ubalandirize,
unayami bazimiiza, bataki boneke mu kihugo.