2
Nahano ashomba akaaya keꞌYerusaleemu
1 Lolagi! Nahano akoli rakiiri,
keera anateeza abandu beꞌYerusaleemu ishoni.
Kundu ubulangashane bwabo bwâli hikiiri mwiꞌgulu,
halikago, keera akabutibula haashi mu kihugo.
Kiri neꞌnyumba yage, ikyanya âli koli rakiiri,
atanagikejeerera, si akagiyibagira.
2 Nahano atakayuvwirwa abandu baage ikimino,
si akayami bashereegeza inyumba zaabo.
Na bwo âli koli rakiiri,
anayami hongola inyumba zooshi zaꞌBayuda.
Ubwami bwabo, anabudeedeka haashi,
anabubonia ishoni, kiri naꞌbatwali baabo.
3 Ikyanya Nahano akashavuraga,
anayami vuna-vuna imisi yaꞌBahisiraheeri.
Kyo kitumiri abagoma bakabateera,
atanatami bashwira mbu abatabaale.
Yabo bandu baage, anayami basingoola mu muliro,
halinde ikihugo kyabo kyoshi, anakijigiivya.
4 Nahano akateera abandu baage, mu kubafworera kwoꞌmuheto, nga kwo angateera umugoma.
Na kundu imisore yabo yâli nonosiri, akakoleesa ubushobozi bwage, mu kugiminika.
Ku buraakari bwage, akayami mwagula umuliro,
mu kuyokya akaaya kaage keꞌSayuni.
5 Nahano akayihindulira Abahisiraheeri,
anayami bamirangusa.
Yoho wee! Akamirangusa kiri neꞌnyumba zaabo zoꞌmulimbo,
anahongola neꞌnzitiro zaabo ngomu.
Kwokwo, kwo agayushuulira Abayuda amalira neꞌkimombo.
6 Ikyanya Nahano akahongola inyumba yage, ikayami yibumbulika haashi,
nga kulya ikitunda kiri mu hongolwa mu ndalo.
Akayami bayibagiza isiku ngulu, kiri noꞌlusiku lweꞌSabaato.
Na bwo âli rakiiri bweneene, anayami lahira mwami wabo, kiri naꞌbagingi.
7 Ku kasiisa, Nahano akazira akatanda kaage,
anazira neꞌnyumba yage nyiija i Sayuni.
Analekeerera abagoma bayiji hongola inyumba nzitire.
Mwomwo mu nyumba yage, banakizi bandira mwaꞌkabuuli hiꞌgulu lyoꞌbuhimi bwabo,
nga kwaꞌbandu ba Rurema bâli kizi gira mwo ku lusiku lukulu.
8 Nahano akashungika bweneene ngiisi kwo agahongola inzitiro ízizungulusiri akaaya keꞌSayuni.
Yizo nzitiro, kundu zâli shuumiri bweneene, zanayami yihongoleka haashi, buu!
9 Imiryango yaꞌkaaya, keera ikayihongoleka haashi.
Akayami vungula-vungula ibyuma byoꞌkugihamika.
Abaami baako, kuguma naꞌbaluzi, keera bakatwalwa hala mu mahanga, bagendi ba baja.
Neꞌmaaja zaage zitakiri mu kola.
Kiri naꞌbaleevi baage, batakiri mu bona amabone ga Nahano.
10 Abakulu beꞌSayuni, bakoli yisiri haashi, bali kanyerere!
Bakoli yambiiti ibyambalwa byoꞌkugandaara, iri banayitumuulira ulukungu mu matwe.
Abanyere beꞌYerusaleemu nabo, bakola mu hunika amatwe hiꞌgulu lyeꞌshoni.
11 Keera nabululuka bweneene,
halinde amasu gaani ganayami konoka.
Umutima gwani gutakiri mu yika mu nda.
Ikyanya nabona ngiisi kwaꞌbandu baani bagweti bagaminikwa, emwe! Nanayabirwa ukuyihangirira.
Si kiri noꞌtuboojo, tukola mu fwira mu njira!
12 Abaana bagweti bagalirira banyina, iri banabatakira, ti:
«E maashi maawe, ibyokulya neꞌbinywebwa, biryagagi hayi?»
Balya baana, bakola mu lenguka mu kaaya,
nga musirikaani úwakomeresibwa mwiꞌzibo.
Yoho wee! Bakola mu fwira mu maboko ga banyina.
13 E Yerusaleemu! Kuti kwo nangaki deta hiꞌgulu lyawe?
Si ndaakyo nangakushushaania!
E kaaya keꞌSayuni! Kutagi kwo ngalonga ukukuholeeza?
Nga kweꞌnyaaja iyisiri bweneene, kwo na kwokwo naawe ukoli sherebiiri ngana-ngana,
ndaanaye úwangaki kukiza.
14 Abaleevi biinyu, ikyanya bâli kizi bona amabone,
si gâli kizi ba ga bibeesha naaho, noꞌkuhendana!
Batâli kizi mùyereka ibyaha biinyu, mbu lyo mukizibwa.
Kyanatuma mugagendi twalwa i mahanga.
Bâli kizi mùhabura, mu kumùbikiisa umulangaaliro gwoꞌbusha.
15 E Yerusaleemu! Ikyanya abagoma bali mu lenga imwawe,
bali mu kuhonyoleza, ti honyo!
Banali mu kulakiza inguuju, iri banazuuza amatwe gaabo, ti:
«Kano kaaya, si bashuba mu deta kwo ko kiija ukuhima utundi twoshi,
na kwo kali mu shambaaza abandu mu bihugo byoshi!»
16 Nanga, maashi! Abagoma baawe booshi, bakola mu mùfuka akahoogo,
banakola mu mùlakiza inguuju, iri banamùhinikira amiino ku buraakari.
Banakola mu mùkanukira, ti: «Leero twamùmirangusa.
Ee ma! Luno lusiku, twâli kizi lulindirira ku kyedu.
Na buno, keera lwahikaga.»
17 Yubwo buhanya, bukakoleka nga kwo Nahano âli mali gwanwa abushungika.
Kwokwo, kwo akatulagaania, keera anabukwizagya.
Akaaya keꞌYerusaleemu, ndaakyo kimino kyo akakayuvwirwa,
si akayami kahongola.
Buno, abagoma baage bakola mu kahonyoleza, ti honyo!
Yabo bagoma baawe, keera akabahemya amatwe!
18 Abandu beꞌSayuni banatabaaza Nahano!
E luzitiro lweꞌSayuni! Leka imigenge ikizi kuhunguluka mwo nga lwiji.
Ugire ukizi lira imbere lya Nahano ubushigi niꞌzuuba!
Utakizi yoherera, si ukizi bululuka ngana-ngana!
19 Ubushigi bwoshi ukizi yama ugweti ugaborooga.
Ngiisi byo ubishiri mu mutima gwawe, ubimenyeesagye Nahano.
Abaana baawe, bakola mu holera mu ngiisi njira hiꞌgulu liꞌshali.
Kwokwo, ukizi golola amaboko mu kumútabaaza.
20 E Nahano! Lolaga ngiisi kwo ugweti ugalibuza abandu baawe.
Si abakazi bakola mu lya abaana baabo,
kundu bo bakabayibutira, banabakuuziri bweneene!
Emwe! Kiri naꞌbagingi naꞌbaleevi, ka byangaziziragi kwo bayitirwe mu nyumba yawe?
21 Imisore naꞌbashaaja, booshi keera bakayitwa ku ngooti.
Ibirunda byaꞌbanyere naꞌbatabana, bikoli lambamiri mu njira.
Si wenyene we kabayita ku buraakari bwawe,
buzira kubayuvwirwa ikimino!
22 Maama wee! Ku lusiku lwo wâli rakiiri,
ukalaalika banakuhambwa ukulyoka imbande zooshi, banayiji tujengeeza.
Wâli nga wabalaalika ku lusiku lukulu, bayiji tulya.
Mu bandu baawe, ndaaye úkafuuka.
Balya baana booshi, keera bakayitwa,
kundu nꞌgabalera, nanâli bakuuziri.