5
Umukulu agabutirwa i Betereheemu
1 Nahano adeta kwokuno: «E kaaya keꞌBetereheemu yeꞌHefurata!
Mu bandu beꞌBuyuda, wehe, we kaaya kaniini.
Kundu kwokwo, mu mwawe mwo mugalyokaga umutwali waꞌBahisiraheeri.*5.1 Mataayo 2.6. »
Invuuko yage iri ya mu bandu ba keera bweneene.
2 Nahano, agatanga abandu baage mu bagoma,
halinde ukuhisa ku kyanya umukazi agaabuta umwana waꞌkalenge.
Haliko, hagaatama, beene wabo banahunguuke,
banagalukire mu kihugo kyabo kyaꞌBahisiraheeri.
3 Ku yikyo kyanya, umukulu wabo agayimanga,
anakizi hahalira abandu baage.
Agaaba neꞌmisi ya Nahano,
anabe noꞌbushobozi bwiꞌziina lya Rurema Nahamwabo.
Kwokwo, Abahisiraheeri bagaramba mu kati koꞌmutuula.
Mukuba, uyo mukulu agakuzibwa bweneene mu bihugo byoshi,
4 anakizi bileeta mwoꞌmutuula.
Ubukize noꞌkutwirwa imaaja
Abahasuriya bagayiji teera ikihugo kiitu,
banakizi libata ku nyumba ziitu mbamu.
Kinatume tugabiika abatwali balinda, bakizi tulanga.
Ee! Ibirongoozi munaana, byo bigaturongoora.
5 Yabo batwali, bagaminika Abahasuriya ku ngooti zaabo.
Bagagwata ikihugo kyeꞌHasuriya mbira ku ngooti zaabo nyomole.
Kwokwo, ikyanya yabo Bahasuriya bagayiji lenga ku mbibi ziitu,
gira bayiji tuteera mu kihugo kiitu,
yabo batwali bagatukiza mu maboko gaabo.
6 Abahisiraheeri ábagaaba basigiiri, bagayiji gingikwa mu mahanga.
Bagaaba nga kimi kya Nahano, kandi iri nga mitonyi yeꞌnvula ku byasi.
Ndaaye mundu úwangabahangirira,
kandi iri ukubatindiisa.
7 Yabo Bahisiraheeri ábasigiiri, bagayiji gingikwa mu mahanga.
Bagagingikwa nga ndare mu nyamiishwa za mu lubako,
na nga mwana weꞌndare úwayilala mu kiso kyeꞌbibuzi.
Iyo ndare, iri mu yami bisimbira kwo, inakizi bijanganula-janganula,
ndaanaye úwangabifuusa.
8 Kwokwo, lyo mugalonga ukuhima abagoma biinyu.
Ee! Yabo bagoma booshi, munakizi baminika.
9 Nahano adetaga kwokuno:
«Ku yikyo kyanya, ngashereeza ifwarasi ziinyu, kuguma naꞌmagaare giinyu giꞌzibo.
10 Ngahongola utwaya twinyu tuhamu, kiri noꞌtwaya twinyu tuzitire twoshi.
11 Ngashereeza ibiheeko biinyu byoshi,
halinde mutagaki ba noꞌmundu woꞌkumùlagula.
12 Ngavungula neꞌmigisi yinyu yoshi,
kuguma neꞌnguliro zaꞌmabuye zo mugweti mugayikumba.
Yibyo byoshi byo mukabaaja naꞌmaboko giinyu,
mutagaki ba noꞌbulyo bwoꞌkukizi biyikumba.
13 Ngahongolaga imigisi yinyu Hasheera,
na njereeze noꞌtwaya twinyu.
14 Na bweꞌbinyamahanga bitaganyuvwiriza,
ngola ngabiyihoola ku buraakari bwani.»