6
Nahano alega abandu baage
1 Muyuvwirize! Si Nahano ambwira kwokuno:
«Yimuka, uyibulanire kwiꞌzu lihamu.
Ikyanya ugaadeta, utugangazi naꞌmalambo tugaaba tumasi, banakuyuvwe.»
2 E malambo! Muyuvwagwe ngiisi kwo Nahano agalegana.
Na niinyu mweꞌndaliro zeꞌkihugo, muyuvwirize kwakundi.
Nahano agweti ulubaaja naꞌbandu baage.
Agweti agabuulania Abahisiraheeri.
3 Nahano adetaga kwokuno: «E maashi bandu baani!
Kuti kwo nꞌgamùhubira?
Na kituma kiki mukaluha hiꞌgulu lyani? Munjuvye!
4 Si nꞌgamùlyosa mu kihugo kyeꞌMiisiri,
nanamùkiza mu buja.
Nꞌgalungika Musa, na Harooni, na Miryamu, gira bamùtabaale.
5 E maashi, bandu baani! Kengeeragi bwija
ngiisi kwo Balaaki, mwami weꞌMohabu âli loziizi ukumùdaaka.
Mukengeere ngiisi kwo Balaamu, mugala Behoori akamúshuvya.
Kengeeri na ngiisi kwo nâli kizi mùkiza,
ukulyoka i Shitimu, halinde ukuhisa i Girigaali.
Munamenye kwo Nahano agweti agaagira íbikwaniini!»
Ngiisi byo Nahano aloziizi imwaꞌbandu baage
6 Mugweti mugayibuuza, mbu: «Nahano atuuziri hiꞌgulu lya byoshi.
Aahago! Ikyanya ngayiji fukama imbere lya Rurema úli mwiꞌgulu, ngamúleetera biki?
Ka nimúyijire naꞌmatuulo geꞌnyana yoꞌmwaka muguma?
7 Ka Nahano angasiima, mbu bwo namúleetera ibipanga bihumbi?
Kandi iri indango bihumbi ikumi zaꞌmavuta?
Ka nangamútangira ifula yani yo nꞌgayibutira,
mbu lyo angoga ibyaha byani?»
Nahano ahana ubutebani
8 E mundu! Si keera Nahano akubwira ngiisi íbiri biija,
na ngiisi byo akuloziizi kwo.
Aloziizi ukizi girirana íbikwaniini,
unabaagage ukuuziri ukukejererana,
unakizi yerekana ubutuudu imbere lyage.
9 Iri mwangaba mulyagagi bitegeereza, mugasimbaha Nahano!
Ikyanya akola agaahana, mukizi múbiika kwoꞌbutwaze.
Izu lyage ligweti ligaberangira mu kaaya keꞌYerusaleemu kwokuno:
10 E banangora-mabi, si nyumba ziinyu ziyijwiri ibindu bingi byo mukalonga mu kugungana!
Zinalyagagi mweꞌbigero byo mugweti mugagungana mwo!
11 «Aahago! Ikyanya abandu bagweti bagalyalyania, ka nangabalekeerera?
Nanga, maashi! Si bali mu koleesa ingero zoꞌkugungana!
12 Abagale ba mu kaaya kiinyu, bagweti bagayitana.
Abandu biinyu bakoli komiiri ukukizi beesha,
batanganaki hasha ukudeta íbiri ukuli.
13 Bwo mukoli yifuuziri mu byaha,
ngamùhombeesa, nꞌgabuli mùshereeza.
14 Kundu mugakizi lya, si mutagaki yiguta.
Amabunda giinyu gagayama gali mamaata.
Na kundu mugakizi lunda ibindu, haliko bigakizi nyerera!
Ngiisi byo mwasingula, ngaaleka binyagwe ku ngooti.
15 Na kundu mugabyala imbuto, si mutagaziyimbula.
Na kundu mugalibata ku mizehituuni, si mugaabula amavuta.
Na kundu mugakandaga imizabibu, si ndaayo divaayi yo mugalonga.
16 Na íbitumiri bigaaba kwokwo,
bwo mukoli gweti mugakizi yifunda mu byaha bya mwami Homuri, na mwami Ahabu.
Ngiisi byo bagweti bagamùhanuula,
byo mugweti mugayami yifunda mwo.
Ku yukwo, ngamùleka musherezibwe.
E ma! Kundu abandu baki tuuziri mu kaaya kiinyu,
halikago, abagoma bagakizi mùshekeereza.
Ibinyamahanga bigakizi mùhonyoleza.»