2
Ngiisi kwoꞌmwitegeereza ali mu genduukirwa
1 E mwana wani, ukizi yemeera amagambo gaani.
Ikyanya nakuyereka íbikwaniini, ukizi bisingula mu mutima gwawe.
2 Ukizi tegaga amatwiri ku magambo goꞌbwitegeereze,
unabe ugafitiirwi kwo, lyo usobanukirwa.
3 Ukizi huuna kwo uhaabwe ubwitegeereze,
unakizi ndakira, lyo ulonga ukusobanukirwa.
4 Yubwo bwitegeereze, ukizi bushakula nga kwo wangashakula iharija.
Na kundu bwangaba nga bubishirwi, ukizi bulooza ngana.
5 Iri wangagira kwokwo,
lyo ugalonga ukusobanukirwa kwo Nahano akwaniini akizi simbahwa.
Na mwiꞌyo njira, unalonge ukumenya Rurema ngiisi kwo ali.
6 Mukuba, Nahano naaho, ye mu haana ubwitegeereze.
Ali mu haana noꞌbumenyi kwakundi, halinde abandu banasobanukirwe.
7 Iri abandu bangakulikira ibyoꞌkuli, lyo bagaaba bali noꞌbwitegeereze.
Mukuba, ngiisi ábatali naꞌmahube, ali mu bashuutira.
8 Ee! Ngiisi ábatuuziri mu kati koꞌkuli, ali mu balanga mu kuli kwabo.
Na ábali mu fiitirwa ku byeꞌmwage, ali mu bakingira.
9 Ku yikyo kyanya, lyo ugasobanukirwa na íbikwaniini,
na íbiri biija, na íbiri byoꞌkuli, na íbitungiini.
10 Ee! Ugalonga ubwitegeereze mu mutima gwawe.
Noꞌbumenyi bunakizi kusimiisa.
11 Ubwitonde bugakizi kukingira.
Noꞌbumenyi bunakizi kulanga.
12 Ikyanya banangora-mabi bagaagira mbu bakulyeryege,
ubwitegeereze bugakizi kukiza.
13 Injira ízigolosiri, yabo babi bali mu zijandagira,
gira bakizi genda mu kihulu.
14 Bali mu siima ukukizi yifunda mu mabi.
Banali mu kizi shambaalira ukushobeka amagambo goꞌkuli.
15 Ngiisi byo bagweti bagaagira, bihengamiri.
Ngiisi ho bali mu lenga, bali mu lyeryegana.
16 Ubwitegeereze bugakukiza na ku mukazi mushule.
Uyo mukazi, ehee! Ali mu gira mbu akuyeruze ku magambo malembu-malembu.
17 Ali mu ba keera akasiga yiba, ishasha yage,
anabe atatwaziizi ikihango kyo akanywana imbere lya Rurema.
18 Ngiisi úwayingiraga mu nyumba yage, iri agenda imwa Nakuzimu.
Injira zaage ziri mu lola naaho mu bafwiri.
19 Mu bali mu genda imwage, ndaaye úwangagaluka,
ndaanaye úli mu shubi longa ubugumaana.
20 Ku yukwo, ukizi yigira umugani ku bandu biija,
unakizi kulikira injira za ábatungiini.
21 Mukuba, ngiisi ábatungiini, bo bagatuula mu kihugo,
na ngiisi ábali bazira kashembo, bagagenderera ukuyama mwo.
22 Si banangora-mabi boohe, bagatwibwa mu kihugo.
Abalyalya bagakabulirwa hala.