16
1 Kundu umundu ali mu shungika mu mutima gwage,
haliko ubuzinda, ishungi za Nahano zo ziri mu koleka.
2 Ngiisi byoꞌmundu ali mu gira, kundu byangaboneka kwo byo bikwaniini,
haliko Nahano ali mu gera íbiri mu mutima gwage.
3 Ngiisi byo uli mu kola, ukizi bisikiiriza Nahano.
Kwokwo, lyeꞌshungi zaawe zikizi genduukirwa.
4 Nahano ali mu koleesa ngiisi igambo, ukukulikirana neꞌshungi zaage.
Kiri na banangora-mabi, ababikiiri ulusiku lwo agabahana kwo.
5 Abanabwikangaate, Nahano abashombiri.
Ku kasiisa, ngiisi muguma wabo agaahanwa ngana.
6 Ibyaha bigaakogwa ku njira yoꞌkukundana noꞌkuyemeerana.
Na mu kusimbaha Nahano, lyoꞌmundu ali mu kizi yiyeka amabi.
7 Imikolezi yoꞌmundu, iri yangasimiisa Nahano,
ali mu múnywaniisa kiri naꞌbagoma baage.
8 Umundu, nga angaba neꞌbindu biniini, anabe atuuziri mu kati koꞌkuli, iri ahiriirwi,
ho angalonga akanyabungaka keꞌbindu, anabe ali ngunge.
9 Kundu umundu ali mu shungika mu mutima gwage,
haliko Nahano ye kwaniini amúyereke ngiisi kwo agaagira.
10 Mwami ali mu kizi kyula ku burongoozi bwa Nahano.
Kwokwo, ikyanya agakizi hana abandu, kukizi ba mu kati koꞌkuli!
11 Nahano aloziizi ibigero íbikwaniini.
Amabuye miija goꞌkugera mwo, gooshi, gali geꞌmwage.
12 Ngiisi ábali mu gira amabi, mwami ali mu bashomba,
mukuba ubutwali bwage, buyimaaziri ku kuli.
13 Ikyanya umundu ali mu deta ukuli, ali mu simiisa abaami.
Ee! Bakuuziri úli mu deta íbikwaniini.
14 Ikyanya mwami araakara, yubwo buraakari bwage bwangayitiisa!
Kundu kwokwo, umwitegeereza akizi múhoohya.
15 Ikyanya amalanga ga mwami gakeruusiri, iri hali ubugumaana.
Biri nga bibungu íbiri mweꞌnvula ku kyanya kyeꞌkikamo.
16 Iri wangalonga ubwitegeereze, kwo kukulu ukuhima inooro.
Ee! Ho wangalonga iharija, ukulonga ubumenyi kwo kukulu.
17 Abandu biija bali mu yiyeka naꞌmabi.
Ngiisi úli mu langa injira yage, ye mu langa noꞌburambe bwage.
18 Ikyanya umundu ali mu yiheemya, iri akola agashereezibwa.
Ee! Ikyanya ali mu yikangaata, iri akola agayihongoleka haashi.
19 Buli bwija ukuba mutuudu, kundu wangatindimazibwa,
ho mwangagabaana iminyago na ábali mu yikangaata.
20 Ikyanya umundu ayerekezibwa, anayuvwe, ali mu genduukirwa.
Ahiriirwi, ngiisi úbiisiri Nahano kwoꞌmulangaaliro.
21 Abitegeereza bayijikiini kwo basobanukiirwi,
bwaꞌmagambo gaabo gali manunu, banali mu yigiriza bwija bweneene.
22 Ikyanya abandu bali mu sobanukirwa, lyo bali mu longa ubugumaana.
Si abahwija, boohe, ikyanya bali mu hwijikala, bali mu hanwa.
23 Imitono yoꞌmwitegeereza iri mu mútabaala ukudeta bwija,
halinde analonge ukukizi yigiriza bwija.
24 Amagambo miija gali mu ba nga buuki.
Gali mu simiisa umutima, ganali muti gwaꞌmagala.
25 Umundu, mu masu gaage, hali injira yo angabona kwo itungiini,
si ku mbeka, inabe ya kumútwala mu lufu.
26 Umwena gwoꞌmukozi, gwo guli mu tuma agaakola.
Ee! Guli mu tuma agagenderera ukuhimbuukira.
27 Banangora-mabi bayamiri bali mu shungika amabi.
Ikyanya bali mu deta, amagambo gaabo gali mu yokania nga muliro.
28 Umundu mubi ali mu kizi vyula imilongwe.
Na ngiisi úli mu gambana, ali mu shombania abiira.
29 Úli mu komeresania, ali mu shimya abatuulani baage,
halinde banagendi yifunda mu bitali nga byo.
30 Ngiisi úli mu lolana niꞌsu libi, ali mu ba keera ashungika igambo libi.
Ngiisi úli mu kaaja imihondo, naye ali mu ba ashungisiri ukugira amabi.
31 Ngiisi úli neꞌnvwi, luli lushembe lwoꞌkulangashana.
Ali mu zilonga, mu kukizi gira íbikwaniini.
32 Umwigenderezi, ye mukulu ku ndwani.
Na ngiisi úli mu yihangirira ku bute bwage, ye mukulu ku mundu úli mu gwata akaaya.
33 Abandu bali mu taara ikibare, lyo bamenye íbikwaniini.
Kundu kwokwo, Nahano yenyene, ye mu shungika íbigakoleka.