17
1 Buli bwija ukulya umukate úgukoli yumiri, hanabe noꞌmutuula,
hoꞌmundu angagendi vwajagira ibyokulya mu nyumba íri mweꞌmilongwe.
2 Ikyanya umwana ali mu yiteeza ishoni, umuja mwitegeereza ye gaterekwa ahandu haage.
Uyo muja analonge ubuhyane, nga muguma wa mwiꞌyo mbaga.
3 Nga kweꞌnooro neꞌharija biri mu gezibwa mu kubileeza mu muliro,
kwo na kwokwo Nahano ali mu gera imitima yaꞌbandu.
4 Nangora-mabi ali mu tega amatwiri gaage ku magambo mabi.
Umubeeshi ali mu yuvwiriza amagambo geꞌnzigo.
5 Iri umundu angashekera umukeni, iri akeneka Ulya úkamúbumba.
Ngiisi úli mu kizi shambaalira amalibu goꞌwabo, naye agaahanwa.
6 Umwijukulu woꞌmundu, lwoꞌlushembe lwage.
Naꞌbaana bali mu yiyuvwa hiꞌgulu lyaꞌbabusi baabo.
7 Umuhwija atakwaniini ukuyikangaata.
Neꞌngingwe, umutwali atakwaniini akizi beesha.
8 Ikyanya umundu ahaana ikitulire, ali mu tona kwo luli lushumbi,
na kwo agagenduukirwa mu byo agakizi gira.
9 Ngiisi úli mu bwikira amahube goꞌwabo, ali mu kundana.
Si ngiisi úli mu kizi gadeta, yehe, ali mu vyula ubugoma.
10 Umwenge, ikyanya ali mu hanuulwa, ali mu longa akamaro bweneene,
ukuhima akamaro koꞌmuhwija, úli mu titimbwa ibifune igana.
11 Nangora-mabi, inzaliro zaage ziloziizi naaho ukuhuna.
Ku yukwo, agatumirwa umutungwa mulangi bweneene!
12 Ho umuhwija angakizi yifunda mu buhwija bwage,
bwangaba bwija ahumaanane neꞌndare íyatwalwa abaana.
13 Umundu, iri angagalula amabi ku miija,
yago mabi gaage, gatâye lyoke mu nyumba yage.
14 Ukushomboroza umulongwe, kuli nga kuhongola amabenga, amiiji ganagolombe.
Kwokwo, ikyanya umulongwe gutazi tondeera, buli bwija ukizi guyiyeka.
15 Ukuheereza umunabuhube ukuli, noꞌkuhana umuzira buhube,
yibyo byombi, biri mu yagaza Nahano.
16 Umuhwija, kundu bangamúfumbasa ifwaranga
mbu agendi gula ubwitegeereze, ka angagenduukirwa?
Si yehe yenyene, ataloziizi ukubulonga.
17 Umwira woꞌkuli, ayamiri ali mu kundana ngiisi kyanya.
Na mwene wabo umundu, íbitumiri ali mu butwa, gira akamútabaale ku kyanya kyaꞌmakuba.
18 Umuzira bwitonde ali mu yitanga abe shinga,
hiꞌgulu lyoꞌmwenda gwoꞌgundi mundu.
19 Ngiisi úkuuziri ukulongoola, ali mu ba akuuziri ibyaha.
Na úli mu yikangaata, ali mu yikululira ubushereeze.
20 Umundu, iri angatuula ali mulyalya, ndaahyo angalonga.
Bwo ali mu lyalyania, ali mu yiyingiza naaho mu malibu.
21 Ngiisi úli mu buta umwana muhwija, ali mu kizi jengeerwa.
Yishe woꞌyo mwana atali mu shambaala.
22 Ikyanya umundu ali noꞌmutima gweꞌshagayo, guli muti mwija.
Si umutima gwaꞌkazingati, guli mu hangalaza amavuha.
23 Nangora-mabi ali mu yakiira ikitulire,
gira agendi shobeka íbikwaniini.
24 Ngiisi úli mu sobanukirwa, ali mu kizi lola ku bwitegeereze.
Si amasu goꞌmuhwija, gali mu kizi lyeguuza-lyeguuza, halinde ku mbeka zeꞌkihugo.
25 Umwana muhwija ali mu jengeeza yishe.
Kiri na nyina, ali mu longa ubululu.
26 Umundu muzira buhube, butali bwija ukumúhana.
Butanali bwija ukushulika abatasumbwa.
27 Umwitegeereza ali mu yihangirira ku magambo gaage.
Ngiisi úli mu sobanukirwa ali mu kizi yitonda.
28 Kiri noꞌmuhwija, iri angayihulikira, ali mu boneka kwo ali mwitegeereza.
Ee! Iri angaziba akanwa kaage, ali mu menyeekana kwo asobanukiirwi.