18
1 Umundu úli mu yihandula ku baabo, ali mu yikundirira yenyene.
Ikyanya ali mu hanuulwa, ali mu yami yagalwa naaho!
2 Umuhwija atasiimiri ukusobanukirwa.
Si ali mu siima naaho ukutyabiriza ululimi ku byeꞌmwage.
3 Iri wangakizi gira amabi, abandu bagakushomba.
Neꞌri wangateezania ishoni, bagakuhonyoleza.
4 Amagambo goꞌmundu gali mu ba ngiꞌbenga.
Si ubwitegeereze, bwohe, buli nga lwiji úluli mu hinga.
5 Ukugingika banangora-mabi, butali bwija.
Butanali bwija ukuyima umuzira buhube ukuli kwage.
6 Amagambo goꞌmuhwija ali mu deta, gali mu leeta ibihaali,
abandu banahambiri múhimbula!
7 Ngiisi byaꞌbahwija bali mu deta, byo biri mu basherebeza.
Ee! Amagambo gaabo boonyene gali mu batega.
8 Amagambo goꞌlugamba gali mu hesha nga byokulya binunu.
Abandu bali mu gamirangusa.
9 Ngiisi úli mu yolohera umukolwa gwage,
ye muguma noꞌmushereeza.
10 Iziina lya Nahano, iri nyumba nzitire bweneene!
Ábakwaniini bali mu gitibitira mwo, banagilongere mwoꞌmutuula.
11 Abagale, ibindu byabo biri mu balanga.
Banatoniragi kwo luli luzitiro lukomu.
12 Ngiisi úli mu yikangaata, akola agashereezibwa.
Si abatuudu, boohe, bali mu longa ulushaagwa.
13 Ikyanya umundu ali mu yitalukiza mu kushuvya,
iri keera ayifunda mu buhwija, anateezibwe ishoni.
14 Ikyanya umundu alwaziri, umutima gwage guli mu ba guki kaniri.
Si umutima, iri gwangaderuuka, atangaki ba ho.
15 Ngiisi úli mu sobanukirwa, ali mu yiyushuulira ubumenyi.
Amatwiri gaage gali mu kizi bulooza.
16 Ikyanya umundu atee tanga indengu, ziri mu gwanwa zamúyigulira injira,
halinde analonge ukuhika imbere lyoꞌmukulu.
17 Ngiisi úli mu tangi buulana, amagambo gaage gali mu yuvwikana kwo gali miija.
Si ha nyuma, ugundi anayiji múnyomoosa.
18 Ikibare kiri mu hambuula abandu,
kiri na ku kyanya ibihagange byahambanwa.
19 Ngiisi úwahubirwa, ukumúyihulukaania kuli kukayu ukuhima ukugwata akaaya kazitire.
Imilongwe iri mu handulana nga migaliro yeꞌnzitiro.
20 Ngiisi byoꞌmundu ali mu deta, biri mu tuma agagenduukirwa.
Ee! Ali mu longa akamaro, ukukulikirana na ngiisi kwo ali mu deta.
21 Amagambo goꞌmundu gashobwiri ukukizania, kandi iri ukuyitana.
Ngiisi ábali mu siima ukudeta-deta, bali mu yikululira umwama.
22 Ngiisi úwalonga umukazi, iri alonga ikindu kiija.
Ku njira ya mukaage, Nahano ali mu múgashaanira.
23 Kundu umukeni ali mu kizi takira umugale ku bwigenderezi,
si uyo umugale ali mu múshuvya neꞌminaako.
24 Muguma ali mu deta mbu ali mwira noꞌwabo, kiziga agweti agamúshereeza.
Kundu kwokwo, hali umwira woꞌkuli, úli mwemeera ukuhima mwene wabo umundu.