19
1 Kundu umundu angakena, haliko anabe ali mu gira íbikwaniini,
ahimiri umuhwija úli mu kizi ravwanga.
2 Umundu úli noꞌmwete, si atanabe noꞌbumenyi, butali bwija.
Butanali bwija ukuyami kola ku mulindi, unakengeere wahuba.
3 Umuhwija, ubuhwija bwage bwo buli mu músherebeza.
Kundu kwokwo, ali mu rakarira Nahano.
4 Iri umundu angaba ali noꞌbugale, buli mu múkuumaniza abiira.
Si abiira boꞌmukeni boohe, bali mu mújandirira.
5 Akamasi keꞌbibeesha katali mu liikwa, mbu kayigendere.
Bwo ali mu beesha-beesha, atagafuuka ukuhanwa.
6 Abandu bingi bali mu looza babe katoni kaꞌbatwali.
Ee! Ikyanya umundu ali mu kizi gabirana, ngiisi mundu ali mu siima kwo abe mwira wage.
7 Umukeni ali mu neenwa na beene wabo.
Kiri naꞌbiira baage bali mu mújanda.
Na kundu angagenda abatibitiiri, iri anabatakira,
batakiri mu boneka.
8 Ngiisi úli mu longa ubwitegeereze, ayikuuziri yenyene.
Ngiisi úkuuziri ukukizi yiga, agakizi genduukirwa.
9 Akamasi keꞌbibeesha katagaliikwa mbu kayigendere.
Bwo ali mu beesha-beesha, ubuzinda agaafwa.
10 Bitakwiriiri kwoꞌmuhwija avwagarare mu kanyabungaka keꞌbindu.
Na kandi, abaluzi batakwaniini bakizi twalwa noꞌmuja.
11 Umwitegeereza atali mu raakara duba-duba.
Atali mu twaza amahube, kyo kitumiri bali mu múgingika.
12 Ikyanya mwami araakara, ali mu ba nga ndare ígweti ígalunduma.
Si urukundo lwage, luli mu ba nga kimi íkiri ku katendeezi.
13 Umwana muhwija ali mu hombeesa yishe.
Noꞌmukazi úli mu longoozania, ali nga nvula yoꞌmunjogi-njogi.
14 Umundu ali mu hyana inyumba, noꞌbundi bugale imwaꞌbabusi baage.
Si umukazi mwitegeereza yehe, ali mu lyoka imwa Nahano.
15 Ubwolo buli mu kizi hondobeza umundu.
Umwolo agakizi yama ashalisiri.
16 Ngiisi úli mu bwirwa igambo, analisimbahe, ali mu yilanga.
Si úgweti úgaligayiriza, agaafwa.
17 Ngiisi úli mu tabaala abakeni, ali mu ba akaaba Nahano yenyene.
Na bwo ali mu gira amiija, Nahano agamúhemba.
18 Ukizi yerekeza umwana wawe, halinde ukizi ba noꞌmulangaaliro.
Si iri wangaleka ukumúhana, iri wamúshereeza.
19 Umundu úli mu raakara bweneene, akwaniini ahanwe.
Na kundu wangamúkiza liguma, haliko bigakuhuuna kwo ukizi múkiza ngiisi kyanya.
20 Ukizi simbaha ihano, unayemeere ukuyerekezibwa.
Noꞌbuzinda, ugaaba uli mwitegeereza.
21 Kundu umundu ali mu shungika bweneene mu mutima gwage,
si ngiisi byo Nahano ashungisiri naaho, byo biri mu koleka.
22 Umundu akwaniini akizi yemeerana.
Ho umundu angakizi lyalyania, ubukeni bwo bukulu.
23 Ikyanya umundu ali mu simbaha Nahano, ali mu longa ubugumaana,
halinde anakizi langwa naꞌmalibu, analuhuuke mu kati koꞌmutuula.
24 Umwolo ali mu lambuulira ukuboko ku ndaala,
atanaki shubi kugalulira ku kanwa.
25 Ikyanya umundu ali mu kizi gayirizania, unamúhimbule.
Kwokwo, lyaꞌbahwija bagayiga íbikwaniini.
Neꞌri wangayerekeza umwitegeereza, agakizi longa ubumenyi.
26 Umwana, nga angazimba ibya yishe, anayimuliise nyina mu nyumba,
iri ayiteeza ishoni bweneene, aganakizi teteerwa.
27 E mugala wani! Iri wangaleka ukukizi kania amigirizo,
ngiisi byo keera wayiga, ugahambiri biyibagira.
28 Ikyanya akamasi kali mu beesha, kali mu gayiriza ukuli.
Ee! Banangora-mabi bakuuziri ukukizi gira amabi.
29 Ngiisi ábali mu honyolezania, bagaahanwa.
Abahwija bagalonga iminyaafu ku migongo yabo, wa kubu!