Ikitaabo kyeꞌ
Zaburi
Indangiriro
Mu zaburi íziri mu yiki kitaabo, mwami Dahudi ye kayandika inyingi (73). Na mu zaꞌbandi bandisi ábatayijikiini, muli (48). Neꞌzeꞌmwa beene Koora (12), neꞌzeꞌmwa Hasafu (12), neꞌzeꞌmwa Sulumaani (2), neꞌyeꞌmwa Musa (1), neꞌyeꞌmwa Hetamu (1), neꞌyeꞌmwa Hemani (1).
Yiki kitaabo kiyerekiini inyimbo zaꞌBahisiraheeri bâli kizi yimbira Rurema. Nyimbo nguma ziri za kuyivuga Rurema hiꞌgulu lyoꞌbulangashane bwage, noꞌkumútangira kongwa. Izindi ziri za kumútabaaza ku kyanya kyaꞌmakuba. Neꞌzindi ziri mu yerekana ngiisi kwoꞌmundu angayilega ibyaha byage. Hali kiri neꞌzindi-zindi.
Yizo zaburi zâli kizi tungwa ku kyanya kila. Neꞌri hakatama, zooshi zanakuumanibwa, zanabiikwa mu kitaabo kiguma.
Imiziizi miguma yiꞌsikamiro iri mu Zaburi 34.2-3: «Ngakizi huuza Nahano isiku zooshi. Akanwa kaani kagakizi múyivuga ngiisi kyanya. Ngakizi yiyuvwa mu kati ka Nahano. Ábagweti bagalibuuka, bagakizi yuvwa kwokwo, banashambaale.»
Íbiri mwo ku bwofi
Izaburi kwo ziri zooshi, ziri mu deta hiꞌgulu lyaꞌmagambo ga kwingi-kwingi. Hano hiꞌfwo, hali mu boneka imiteeko miguma. Na kwakundi, izaburi nguma yangaboneka mwaꞌmagambo ágalyosiri mu miteeko mingi.
a) Izaburi nguma, ziri mu deta ku keera íbikakoleka, kandi iri ku bigaki koleka:
- Izaburi íziri mu yerekana íbikakoleka ku Bahisiraheeri (78; 105; 106)
- ízidesiri bweneene hiꞌgulu lyoꞌbwemeere (11; 27; 56; 105)
- ízidesiri hiꞌgulu lya Masiya (2; 22; 41; 45; 69; 72; 110)
b) Izindi, ziri mu huuza Rurema:
- íziri mu huuza Rurema (23; 67; 84; 95; 100)
- íziri mu deta kongwa imwage (30; 65; 67; 92; 100; 103)
- íziri mu yimbwa mu kugenda i Yerusaleemu ku lusiku lukulu (120-134)
c) Izindi, ziri mu tabaaza Rurema:
- íziri mu mútabaaza (55; 57; 70; 88)
- íziri mu múhuuna ulukogo (32; 51)
- íziri mu huuna Rurema, kwo ahaniirize abagoma (12; 14; 17; 35)
d) Izindi, ziri hiꞌgulu lyeꞌkyanya kyaꞌmakuba:
- íziri mu buuza ibibuuzo bikayu-bikayu, mu kugooka (10; 13; 74)
- Inyimbo zeꞌkimombo (3; 5; 90)
- Inyimbo zaꞌmiiza kandi iri zaꞌkabigingwe (16; 7; 91)
e) Ifwabe ízilondiini:
- Mu zaburi ndebe, ngiisi muziizi, kandi iri ngiisi muteeko, guli mu kulikira ulufwabe luguma-luguma, nga kwo zilondiini (119)
Umuteeko gwa mbere
1
(Zaburi 1–41)
Injira zibiri zoꞌkulama
Ahiriirwi, umundu útali mu twaza banangora-mabi,
anabe atabakombiiri.
Ikyanya bagweti bagashekeereza ibya Rurema, atali mu bayibiika kwo.
Si yehe ayamiri akuuziri imaaja za Nahano,
anali mu kizi ziyitoneesa kwo, ubushigi niꞌzuuba.
Uyo mundu ali mu ba nga kiti kibyale ha butambi lyoꞌlwiji,
kinali mu kizi tongeka ku kyanya kyakyo.
Ibyasi byakyo, bitâye bogame.
Na ngiisi byo ali mu gira, biri mu múgenduukira.
Si balya banangora-mabi, nanga!
Boohe, bali mu saazibwa ngana, nga biguhulu íbiri mu yehuulwa neꞌmbuusi.
Ku yukwo, ikyanya bagatwirwa ulubaaja, batagalegama.
Mukuba, ndaaye munabyaha, úgalegama mu bakwaniini.
Amasu ga Nahano, gayamiri gali mu tanduula ábakwaniini.
Si banangora-mabi boohe, injira zaabo ziri mu bahabura.