4
E Rurema wani, ndi mu kutabaaza
1 Imwoꞌmwimangizi waꞌbimbi. Izaburi ya Dahudi. Luli mu yimbwa neꞌnanga zeꞌmirya.
2 E Rurema wani, ngiisi byo uli mu gira, biyamiri bikwaniini.
Kwokwo, ikyanya ndi mu makuba, na mbe ndi mu kutabaaza,
ukizi njuvya, unandabaale.
Bwo we ndi mu huuna, ukizi nyitaba,
iri unanyuvwirwa indengeerwa.
3 Mwe bagoma, si mulyagagi banabibeesha!
Ngiisi byo muli mu deta, biri bya busha.
Aahago! Mugagenderera ukutyoza iziina lyani, halinde mangoki?
4 Si muyiji-yiji kwo Nahano akayitaluulira ábali bemeera,
kyo kitumiri ali mu kizi yuvwa amahuuno gaani.
5 Ikyanya mwangagwatwa noꞌbute,
mutakizi leka mbu bumùyingize mu byaha.
Haliko, muhulike, munagwejere,
iri munakizi yitoneesa naaho.
6 Mukizi tangira Nahano amatuulo ágakwaniini,
iri munamúbiika kwoꞌmulangaaliro.
7 Abandu bingi, bagweti bagabuuza:
«Nyandagi úwangatukolera amagambo miija?»
Kwokwo, e Nahano, ukizi tugirira amiija.
Yago miija gaawe, gabe nga mulengeerwe úguli mu tuyakira.
8 Keera wanjambaaza bweneene,
na ngoli shambiiri ngana-ngana ukuhima abandu ábakayeza ingano nyingi neꞌdivaayi.
9 E Nahano, ikyanya ndi mu ba ngoli gwejiiri,
ndi mu toola iro lyeꞌkimbodooto mu kati koꞌmutuula.
Mukuba, wenyene we mu ndanga.