5
Ikyanya ndi mu gongeera, unyuvwirize
1 Imwoꞌmwimangizi waꞌbimbi. Izaburi ya Dahudi. Luli mu yimbwa neꞌmiteera-teera.
2 E Nahano, unyuvwirize!
Ikyanya ndi mu gongeera, unyuvwe maashi!
3 We Rurema wani, unali we mwami wani.
Kwokwo, ikyanya ngweti ngakutabaaza mu kati kaꞌmalira, unyuvwirize.
Ndaaye gundi ye ngahuuna, útali wenyene naaho.
4 E Nahano, ngiisi shesheezi, ndi mu kutabaaza,
iri ninalindirira ishuvyo lyawe.
Aaho! Ukizi yuvwa izu lyani.
5 E Rurema, ikyanya banangora-mabi bali mu yifunda mu mabi gaabo,
utali mu siima.
Yabo booshi, ubashombiri ngana,
kinatume batâye fine imwawe.
6 Bwo bagweti bagayikangaata, batâye yimange imbere lyawe.
7 Na bwo bagweti bagabeesha, noꞌkuyitana, noꞌkutebana,
uli mu ba ubashombiri ngana-ngana, iri unabaminika.
8 Haliko niehe, ngayingira mu nyumba yawe,
na ngizi kuyikumbira mwo,
iri ninayibomba-bomba imbere lyawe.
Mukuba, urukundo lwawe luli mu ba luyamiri ho.
9 E Nahano wani, abagoma baani, baloziizi ukundeera.
Aaho! Ukizi ndongoora mu kati koꞌkuli.
Unakizi nyereka injira yo nangatuula mwo bwija.
10 Balya bagoma, mu byo bali mu deta, ndaakwo ukuli, kiri niꞌgambo liguma.
Si mu mitima yabo, baloziizi naaho kwo bakizi yitana.
Ngiisi íbiri mu lenga mu bikorokoro byabo,
biri mu ba nga shinda íziyanuusiri.
Ngiisi byo bali mu deta, biri mu ba naaho bya kulyalyania.*5.10 Barumi 3.13.
11 E Rurema, ubatwirage ulubaaja lwoꞌkuhanwa.
Kundu bali mu kizi deta amagambo goꞌkutegana,
yago magambo, gakizi bagwata boonyene.
Si bagweti bagayifunda mu byaha imbere lyawe.
Aaho! Ubalashage imbuga.
12 Haliko, ngiisi ábagakizi kutibitira, boohe, ukizi balanga.
Uleke bakizi kuyimbira isiku zooshi ku bushagaluke.
Ee ma! Ngiisi ábakuuziri iziina lyawe, ukizi balanga,
halinde banakizi kushambaalira.
13 E Nahano, ngiisi ábakwaniini, uli mu bagashaanira.
Unali mu bashuutira nga siribo, mu kati koꞌrukundo.