8
Iziina lyawe liri mwoꞌbulangashane
1 Imwoꞌmwimangizi waꞌbimbi. Izaburi ya Dahudi. Luli mu yimbwa ngeꞌnyimbo za beene Gaati.
2 E Nahano, Nahamwitu,
iziina lyawe liri mwoꞌbulangashane mu mahanga gooshi.
Ubulangashane bwawe buhisiri kiri na mwiꞌgulu.
3 Keera ukayigiriza abaana ngiisi kwo bagakizi kuhuuza, kiri na boꞌtulenge.* 8.3 Mataayo 21.16.
Kwokwo, lyaꞌbagoma baawe bagaaziba utunwa twabo,
kuguma na ábagweti bagaagira mbu bakuhangirire.
4 Byoshi íbiri kwiꞌgulu, we kabibumba naꞌmaboko gaawe.
We kabiika umwezi neꞌndonde ahandu haabyo.
Yibyo byoshi, ikyanya ngweti ngabiyitoneesa kwo, ndi mu yibuuza:
5 Umundu ali nga nyandi,
halinde uki múkengiiri,
unakizi múhahalira?
6 Ukamúgira abe mwiꞌdako lyawe hiniini.
Wanamúyambika ulushembe,
halinde anagingikwa mu kati koꞌbulangashane.
7 Ibindu byoshi, ikyanya ukabibumba,
wanabiika umundu akizi bitwala.† 8.5-7 1 Bakorindo 15.27; Baheburaniya 2.6-8.
Yibyo byoshi, ukabibiika mwiꞌdako lyaꞌmagulu gaage:
8 ibibuzi neꞌngaavu, neꞌnyamiishwa zooshi za mu kishuka,
9 noꞌtunyuni twa mu kyanyaanya, neꞌfwi mu nyaaja,
kiri neꞌbindi byoshi íbiri mu yoleka-yoleka mwo.
10 E Nahano, Nahamwitu!
Iziina lyawe, liri mwoꞌbulangashane mu mahanga gooshi.