9
Ngiisi ábagoozirwi, umulangaaliro gwabo gutâye here
1 Imwoꞌmwimangizi waꞌbimbi. Izaburi ya Dahudi. Luli mu yimbwa mu kuganya.
2 E Nahano, ngakizi kuyivuga ku mutima gwani gwoshi.
Ibitangaaza byawe byoshi, ngakizi biyerekana.
3 Na bwo we riiri hiꞌgulu lya byoshi,
ngakizi kushagalukira,
na ngizi yimba inyimbo zoꞌkuyivuga iziina lyawe.
4 Abagoma baani, ikyanya bagweti baganyijira, uli mu bagalula.
Uli mu basiitaza, banayami shereera imbere lyawe.
5 Uyamiri ubwatiiri ku kitumbi kyawe kyoꞌbwami.
Ikyanya nꞌgalegwa, wanandwira ulubaaja nga kwo lukwaniini.
6 Ibinyamahanga, si balyagagi banangora-mabi!
Keera ukabakanukira, wanabashereeza,
halinde amaziina gaabo gatanaki detwa.
7 Balya bagoma, keera ukashaabula utwaya twabo,
tuganayama tushasiri,
halinde batanâye ki kengeerwe.
8 Nahano ayamiri ho, imyaka neꞌmyakuula.
Keera akatereka ikitumbi kyage kyoꞌbwami,
gira alonge ukukizi twa imaaja.
9 Abandu booshi ba mu kihugo, agakizi batwira imaaja mu kati koꞌkuli,
anakizi twala ku njira íkwaniini.
10 Ngiisi ábali mu gayirizibwa, Nahano ye butibitiro bwabo.
Ku kyanya kyaꞌmakuba, ye bali mu yibisha mwo.
11 E Nahano, ngiisi ábakuyiji, bagakizi kubiika kwoꞌmulangaaliro.
Na bwo bagweti bagakulooza, utâye bajandirire.
12 Nahano atwaziri i Sayuni.
Kwokwo, mukizi múyimbira inyimbo zoꞌbwivuge.
Na ngiisi byo âli gweti agaagira, mukizi bimenyeesa mu mahanga.
13 Ikyanya abandu bagweti bagalibuzibwa,
bali mu lirira Rurema.
Atanali mu balekeerera,
si ali mu bakengeera, iri anabayihoolera.
14 E Nahano, ubwinagi ngiisi kwaꞌbagoma baani bagweti baganyogogoza.
Aahago! Unyuvwirwe indengeerwa, maashi!
Undyose mu kanwa ka Narufu.
15 Ikyanya ugangiza, ngakushambaalira,
na ngizi kuyivugira kwiꞌrembo lyeꞌSayuni.
16 Ibinyamahanga, kundu bikahumba ubuhya,
haliko keera bikabuyihongoleka mwo byonyene.
Neꞌkyanya bakatega amakira,
kiziga amagulu gaabo, go gakagwatwa mwo.
17 Nahano amenyekiini kwo ali woꞌkuli.
Si yabo banangora-mabi, boohe, bali mu yigwasa mu mitego yabo boonyene.
18 Banangora-mabi bagaherera i kuzimu,
kuguma naꞌbandu booshi ábatatwaziizi Rurema.
19 Si abakeni boohe, bagakengeerwa.
Ee! Ngiisi ábagoozirwi, umulangaaliro gwabo, gutâye here.
20 E Nahano, uyimukage, maashi!
Utwire abandu ulubaaja,
utanaleke kwo babe bo bagaahima.
21 Yabo bandu, ubateerage ikyoba,
halinde bayimenye kwo bali ba kufwa naaho.