10
Amaganya hiꞌgulu lya banangora-mabi
1 E Nahano, kituma kiki ugweti ugayisunga hala?
Si ikyanya tuli mu gwanwa mu makuba, uli mu tuyibisha!
2 Banangora-mabi, ikyanya bali mu libuza abakeni,
bali mu kizi yikangaata.
Aaho! Ikyanya bagakizi shungikira abandi amabi,
babe bo bagakizi gagwatwa mwo.
3 Umundu mubi agweti agayifwija amabi gaage,
anali mu yihaya hiꞌgulu lyago.
Ngahwe! Agweti agahuuza abagugu, iri anadaaka Nahano.
4 Agweti agayikangaata, iri anayitoneesa kwo Rurema ndaaye.
Kyo kitumiri atali mu múlooza.
5 Emwe! Umundu mubi, ngiisi hyo ali mu huma kwo,
hiri mu kizi múgenduukira.
Ayamiri agweti agashekeereza abagoma baage booshi,
si imaaja zaawe, atali mu zitwaza.
6 Mu mutima gwage, atoniri kwokuno:
Ndâye longe amakuba, ndanâye longe amalibu.
7 Ulya mubi, akanwa kaage kayijwiri mwaꞌmadaaki,
anagweti agatebana, iri analyalyania.
Ululimi lwage lugweti lugayagazania naaho.*10.7 Barumi 3.14.
8 Agweti agategeera abandu hoofi noꞌtwaya,
gira ababirigishe, banali bazira buhube.
Na ábatashobwiri, ayamiri agweti agaabalya ibisuure,
iri anabayita ku bumbishwa.
9 Ali mu ba ayiteziri nga ndare, gira agwate ábatashobwiri.
Agweti agabagwasa mu mutego gwage, anabatwale.
10 Abazira ndege, bali mu gwatwa.
Na bwoꞌyo mubi ali kikalage, ali mu yami batimba haashi.
11 Uyo nangora-mabi ayamiri asaliiri kwokuno:
«Si Rurema abishiragi amasu gaage, atanaki tubwini!
Kwokwo, ngiisi byo tugweti tugaagira, atagabibona.»
12 E Nahano Rurema, uyimukage, maashi!
Yabo babi, ukoleese ubushobozi bwawe mu kubahana.
Twenyene tutashobwiri. Kwokwo, utayibagire ukututabaala.
13 E Rurema, kituma kiki nangora-mabi agweti agakushekeereza?
Si agweti agakubwira, mbu: «Ndaakwo ugweti ugangira.»
14 Kundu kwokwo, ubwinagi ngiisi kwaꞌbandu bagweti bagalibuuka,
iri banayingira mu makuba.
Ngiisi lusiku uli mu ba ibiringiini ukubatabaala.
E Rurema, umundu úli mwoꞌbukaholwe, we ayamiri alangaliiri.
We na yamiri uli mu tabaala ifuuvi.
15 Ulya nangora-mabi, ushereezagye imisi yage.
Ububi bwage bwoshi, ubumale, halinde butashubi boneka.
16 Nahano ye mwami weꞌmyaka neꞌmyakuula.
Ee ma! Ibinyamahanga, kundu bakoli tuuziri mu kihugo kyage, bagaki minikwa naaho.
17 E Nahano, yabo banamagoorwa, ukoli yuvwiti ngiisi kwo baloziizi.
Kwokwo, ikyanya bali mu lira, ukizi bayuvwiriza, unabatabaale.
18 Ifuuvi na ábali mu tindimazibwa, uli mu bagirira íbikwaniini.
Abandu booshi, si bakabumbwa mu luvu naaho.
Aahago! Batakizi ki shubi teerana ikyoba.