11
Mbiisiri Nahano kwoꞌmulangaaliro
1 Imwoꞌmwimangizi waꞌbimbi. Izaburi ya Dahudi.
Mbiisiri Nahano kwoꞌmulangaaliro, gira akizi ndanga.
Aahago! Kuti kwo wangaki mbwira:
«Uyinywerereke nga kanyuni, mu kupuumukira ku mugazi gwawe.»
2 Lolaga! Banangora-mabi, bakoli yiteziri mu kimbehwa.
Keera babiika imyambi mu miheto,
banakoli gifwoziri, gira bagilashe ngiisi ábakwaniini.
3 Aaho! Indaliro za íbiri biija, ikyanya zigweti zigahongolwa,
kutagi kwo ábakwaniini bangaki gira?
4 Kundu kwokwo, Nahano atuuziri mwiꞌgulu, mu nyumba yage nyeeru.
Abwatiiri ku kitumbi kyage kyoꞌbwami, iri analola-lola ku bandu.
Amasu gaage gayamiri gali mu baloleekeza.
5 Nahano ali mu loleekeza ku bakwaniini.
Haliko, banangora-mabi boohe, kuguma naꞌbiitani, ali mu bashombereza bweneene.
6 Agabatibulira kwiꞌbengesheeshe lyoꞌmuliro,
gunali mu gulumira bweneene,
ikyuka kyagwo kinabayifuke kwo.
Kwokwo, kwo bagakizi hanirizibwa.
7 Nahano ye kwaniini.
Ngiisi ábali mu gira íbikwaniini, ali mu ba abakuuziri.
Ee ma! Ngiisi ábakwaniini imbere lyage, bagamúbona amasu ku gandi.