17
Ikyanya abandu bali mu tibitira Rurema, ali mu bakiza
1 Amahuuno ga Dahudi.
E Nahano, unyuvwirizagye!
Nakuhuuna kwoꞌlubaaja lwani lutwibwe mu kati koꞌkuli.
Gano mahuuno gaani, galyosiri mu mutima úgutungiini.
Aaho! Ikyanya ngakizi kutabaaza, ukizi ndega amatwiri.
2 Si we yamiri ubwini ngiisi íbikwaniini!
Kwokwo naani, ukizi yerekana kwo ndi mundu woꞌkuli.
3 Ngiisi íbiryagagi mu mutima gwani, ubiyiji bwija.
Keera wandanduula bushigi, wanangera,
wanabona kwo ndaabwo buligo úbundi mwo.
Keera nꞌgahiga kwo ndagaahuba mu kudeta.
4 Na nyamiragi nzimbahiri imaaja zaawe.
Kyo kitumiri ndali mu yifunda mu mabi,
ndanali mu yibiika mu bali mu libuzania.
5 Ngiisi kwo ugweti ugakizi nyereka, kwo na ndi mu gira.
Yizo njira zaawe, ndazindi zihabuka mwo.
6 E Rurema, ngweti ngakuhamagala, na nyiji kwo uganyitaba.
Ku yukwo, undegage amatwiri.
Gano mahuuno gaani, ugayuvwirize.
7 Ikyanya abandu bali mu teerwa naꞌbagoma, banakutibitire,
uli mu koleesa ubushobozi bwawe, mu kubakiza.
Urukundo lwawe, lulyagagi lwaꞌkahebuuza.
8 Kwokwo, ukizi ndanga nga mboni yiꞌsu lyawe.
Unakizi mbisha mu kimbehwa kyeꞌbyubi byawe.
9 Ikyanya banangora-mabi bagaaba banzokaniini, mbu bandeere,
unambalize.
10 Si balya banakuhambwa batahiiti ikimino,
banayamiri bagweti bagayikangaata naaho!
11 Keera bambiiva, banakoli nzokaniini.
Na buno, baloziizi ukundimba haashi.
12 Bakola nga ndare íyuvwiti ishali, inagweti igahiiva byo igaalya.
Bali nga ndare ígweti igategeera ikitugwa, gira ikiyite.
13 E Nahano, uyimukage, maashi!
Balya banangora-mabi, ubahangirire,
unabuli batitimba haashi.
Ukoleese ingooti yawe mu kunguluula.
14 E Nahano, ukoleesagye ubushobozi bwawe
mu kungiza mu kati kaabo.
Si umulangaaliro gwabo guli mu ba ku bya mu kihugo naaho!
Haliko, abandu baawe boohe, ukizi bahagiisa.
Kiri naꞌbaana baabo, bakizi longa íbiri tiita,
halinde ukuhisa kiri na ku bijukulu baabo.
15 Bwo ndi mundu woꞌkuli, tugaki bonaana.
Ee ma! Ikyanya ngavyuka, na ngubone masu ku gandi,
umutima gwani, gugayika mu nda.