16
Ndi mu shambaalira ukubeera imbere lya Rurema
1 Izaburi ya Dahudi.
E Rurema, we mbiisiri kwoꞌmulangaaliro.
Aaho! Ukizi ndanga.
2 Ndi mu bwira Rurema, ti:
«We Nahamwitu, ngiisi biija byo ndi mu longa,
bilyosiri imwawe naaho.»
3 Abemeera baawe, kwo batuuziri mu kihugo,
bo bali mu gingikwa.
Baabo, bo banali mu nzimiisa.
4 Ngiisi ábali mu yifunda mu byeꞌmizimu,
bali mu yiyushuulira umwizingeerwe.
Si niehe, ikyanya bagagendi gitangira amatuulo,
ndâye bayibiike kwo.
Amaziina gaayo, kiri noꞌkugadeta,
gatâye huluke mu kanwa kaani.
5 E Nahamwitu, keera ukambiikira ubuhyane bwani.
Na byoshi byo ukambiikira, wanabisikamya.
6 Ngiisi ho kambiika kwo nduule, emwe,
imbibi zaaho zisimisiizi bweneene.
Yubwo buhyane bwo nꞌgahaabwa,
ku kasiisa, bugweti buganjambaaza ngana-ngana.
7 Nahano ayamiri ali mu mbanuula.
Ku yukwo, ngakizi múyivuga.
Kiri na bushigi, umutima gwani gugweti guganyigiriza.
8 Nyamiri ndi mu biika Nahano imbere lyani.
Na bwo ali uluhande lwani lweꞌlulyo,
ndaabyo íbyangaki njagania.* 16.8 Mikolezi 2.25-28.
9 Ku yukwo, umutima gwani gushagalusiri,
na ngoli shambiiri.
Kiri naꞌmagala gaani, gagatuula gakingiirwi.
10 Bwo ndi mutaluule wawe,
utagandekera i kuzimu,
utagayemeera kwaꞌmagala gaani gabolere yo.† 16.10 Mikolezi 13.35.
11 Uganyereka ngiisi kwo nangatuula bwija.
Unanjambaaze imbere lyawe,
halinde ngizi beera uluhande lwawe lweꞌlulyo,
na mbe njagalusiri, halinde imyaka neꞌmyakuula.