21
Nahano ye mwene ubukalage
1 Imwoꞌmwimangizi waꞌbimbi. Izaburi ya Dahudi.
2 E Nahano, mwami agweti agashambaalira ubushobozi bwawe.
Ee ma! Ikyanya uli mu múhimira, anashambaale ngana.
3 Ngiisi kwo mwami akalooza mu mutima gwage, wanamúkolera kwo.
Ikyanya âli kizi kuhuuna ibindu, wanamúheereza byo.
4 Ikyanya mwami akagaluka, wanamúgashaanira, halinde anagenduukirwa bweneene.
Kwiꞌtwe lyage, wanamúyambika ulushembe lweꞌnooro muguuhya.
5 Ikyanya akakuhuuna kwo alonge ukulama, wanayemeera.
Ee! Ukamúheereza ubulamu, kiri noꞌbulamu bweꞌmyaka neꞌmyakuula.
6 Na bwo ukamúhimira, kyanatuma agagingikwa bweneene,
wanamúheereza noꞌlushaagwa, noꞌbulangashane.
7 Ku kasiisa, ugakizi múgashaanira imyaka neꞌmyakuula.
Bwo muliriinwi, agweti agashambaala ngana-ngana.
8 Mwami abiisiri Nahano kwoꞌmulangaaliro.
Na bwo Rurema úli hiꞌgulu lya byoshi ayamiri amúkuuziri isiku zooshi, atâye kakazibwe.
9 E mwami, ngiisi ábakushombiri, ugabagwata,
unabakone ku bushobozi bwawe.
10 Abagoma baawe, ikyanya ugabahulukira kwo, ugayami basivya,
banajigimbe mu muliro.
Nahano yenyene, agabaminika ku bute bwage,
mu kubasingoola mu muliro.
11 Yabo bagoma, ugabaminika, kuguma naꞌbaana baabo booshi,
hatanasigale kiri noꞌmuguma wabo.
12 Kundu bagweti bagaagira igambi libi hiꞌgulu lyawe,
mu kukushungikira amabi, ndaakwo bagakugira.
13 Ikyanya ugakizi balasha imyambi,
bagakizi yami hinduka, banapuumuke.
14 E Nahano, ukizi yerekana ubushobozi bwawe.
Tugakizi kuyimbira, iri tunakuyivuga, bwo uli noꞌbukalage bweneene.