22
E Rurema, utanyisungage hala
1 Imwoꞌmwimangizi waꞌbimbi. Izaburi ya Dahudi. Luli mu yimbwa ngoꞌlwimbo: «Imbongo, ngiisi kwo iri mu ba ku mutwezi.»
2 E Rurema wani, e Rurema wani! Kituma kiki wanjandirira?
Si wayisunga hala, utanayiji ndabaala!
Kundu ngweti ngagongeera, si ukola nga útayuvwiti.* 22.2 Mataayo 27.46; Mariko 15.34.
3 E Rurema wani, ndi mu shiiba ngweti ngabululuka.
Kiri na bushigi, ndali mu hungeera.
Kundu kwokwo, utali mu njuvya.
4 E Rurema, uyamiri uli mweru. We twaziri,
we nali mu huuzibwa mu Bahisiraheeri.
5 Yaho kare, bashokuluza biitu bâli kizi kubiika kwoꞌmulangaaliro,
wanabaguluula.
6 Ikyanya bakakulirira, wanabakiza.
Yugwo mulangaaliro gwo bâli kubiisiri kwo, gutanafwa ubusha.
7 Halikago buno, ndakiri mundu. Si ngola nga kizimu!
Abandu bagweti bagangayiriza, iri banambonyoleza.
8 Ngiisi ábali mu mbonaga, bali mu njekeereza, iri bananduka.
Bali mu zuuza amatwe,† 22.8 Mataayo 27.39; Mariko 15.29; Luka 23.35.
9 iri banadeta: «Si agweti agalangaalira Nahano!
Aahago! Leka uyo Nahano wage abe ye gamúkiza.
Ee! Iri Nahamwabo angaba amúkuuziri, amúkizagye.‡ 22.9 Mataayo 27.43.»
10 E Nahano, we kandyosa mu nda ya maawe.
Kiri neꞌkyanya nâli ki riiri kwiꞌbeere,
wanangira ngubiike kwoꞌmulangaaliro.
11 Ee ma! Ukulyokera ukubutwa kwani, nâli yamiri ngulangaliiri.
Ukulyokera ho nꞌgalyoka mu nda ya maawe, uyamiri uli Rurema wani.
12 Kundu kwokwo, buno amakuba gangola hoofi, ndaanaye woꞌkundabaala.
Aaho! Utanyisungage hala.
13 Abagoma bingi bakoli nzokaniini nga shuuli.
Balyagagi nga shuuli ndangi zeꞌBashaani.
14 Bakoli yashwiri utunwa twabo, nga ndare,
banagweti bagalunduma, gira banjanganule.
15 Ngolaga nga miiji ágafukwa haashi.
Iningo zaani, zitaki gwetiini.
Kiri noꞌmutima, gukoli jongolosiri nga bulembo.
16 Umumiro gwani, keera gwahangalala nga lugyo.
Ululimi lukoli yumiiri ku lubanga.
Keera wanandambika haashi mu luvu,
na ngola nga úfwiri.
17 Balya banangora-mabi, bakoli nzokaniini nga lukuuli lwoꞌtubwa.
Keera bandula amaboko naꞌmagulu.
18 Amavuha gaani gooshi, gakoli bonesiri.
Abandu bagweti bagambenekera, iri bananyamiriza, yuu!
19 Ibyambalwa byani, bagweti bagabigabaana,
mu kubitaara ikibare.§ 22.19 Mataayo 27.35; Mariko 15.24; Luka 23.34; Yohana 19.24.
20 E Nahano, utandoleere, maashi!
Bwo we misi yani, uyiji ndabaala duba,
21 unangizagye mu zino ngooti, ndafwe.
Ulange ubugumaana bwani mu miino ga yutu tubwa,
22 unangize na mu tunwa tweꞌndare.
Ee! Ungize mu yizi mbogo ndangi.
23 Ngakizi menyeesa iziina lyawe mu beene witu.
Ngiisi ho bakumaniri, ngakizi kuyivuga.* 22.23 Baheburaniya 2.12.
24 Mwe musimbahiri Nahano, mugirage mukizi múyivuga.
Mukizi múgingika, mwe bandu ba Yakobo.
E Bahisiraheeri, mukizi múyikumba mweshi.
25 Mukuba, ngiisi úli mu longa amakuba, atali mu múhindulira ingoto,
atanali mu múgayiriza, atanali mu múnegura.
Si ikyanya ali mu múlirira, ali mu múyuvwiriza.
26 E Nahano, ibyeꞌmwawe,
byo ngweti ngayivuga mu muhumaanano muhamu.
Na ngiisi byo nꞌgakulagaania,
byo na byebyo ngakwiza imbere lya ábali mu kuyikumba.
27 Abakeni bagayiji lya, banayigute.
Kwokwo, ngiisi ábagweti bagalooza Nahano, bagakizi múyivuga,
banalonge ukulama imyaka neꞌmyakuula.
28 Yibyo byoshi, ikyanya Nahano agabigira,
abandu mu mahanga gooshi bagabikengeera, banayije imwage.
Imilala yoshi ya mu kihugo, bagafukama imbere lyage.
29 Mukuba yago mahanga gooshi, Nahano ye gatwaziri.
30 Abagale booshi ba mu kihugo, bagabwatala,
banalye, babuli múyikumba.
Booshi, kwo balyagagi ba kufwa, bagamúfukamira.
Ee ma! Batashobwiri ukuyiyushuulira ku bulamu bwabo.
31 Kiri na ábagaki butwa, bagakizi yiji ganuulirwa hiꞌgulu lya Nahano,
halinde nabo banakizi múkolera.
32 Ee ma! Ábatazi butwa, bagakizi yiji menyeesania ngiisi íbikwaniini.
Yibi byoshi, ye kabigira.