25
Amasu gaani gayamiri gali mu lola ku Nahano
1 Izaburi ya Dahudi.
E Nahano, ngweti ngayitanga imwawe,
2 unali we mbiisiri kwoꞌmulangaaliro.
Aaho! Utandekage mbu ndonge ishoni.
Utanaleke kwaꞌbagoma baani bambime, mbu bashambaale.
3 Mu bandu booshi ábagweti bagakulangaalira,
ndaaye kiri noꞌmuguma úgateerwa neꞌshoni.
Si ngiisi ábali mu huna mu kugiriirira,
boohe, bo bagakizi zilonga.
4 E Nahano, ukizi mmenyeesa imitono yawe.
Uginyigirize, gira ngizi gikulikira.
5 Unakizi nyigiriza, halinde ngizi kulikira ukuli kwawe.
Mukuba, we Rurema Lukiza wani,
unali we ndangaliiri ubwakya-ubwayira.
6 E Nahano, ukengeerage ulukogo lwawe, noꞌrukundo lwawe.
Mukuba, byebyo, byo biyamiri ho ukulyokera kare.
7 E Nahano, kundu nâli kizi huna mu busore bwani,
nanakizi yifunda mu byaha, haliko utakizi ki bikengeera.
Si uli mwija! Aaho! Ikyanya ugakizi ngengeera,
kube naaho mu kati koꞌrukundo lwawe.
8 Nahano alyagagi mwija, anali mu gira íbitungiini,
kyo kitumiri ali mu kizi yigiriza abanabyaha.
9 Ngiisi ábali batuudu, ali mu barongoora mu kati koꞌkuli,
anakizi bayigiriza ibyeꞌmwage.
10 Ikyanya bali mu simbaha ikihango kyage,
banabe bali mu gira nga ngiisi kwo aloziizi,
ali mu bakolera mu kati koꞌrukundo, na mu kati koꞌbwemeera.
11 Kwokwo, e Nahano, bwaꞌmabi gaani gali mingi,
ungogage kwiꞌziina lyawe.
12 Ka hali abandu ábasimbahiri Nahano?
Yabo, ali mu kizi bayereka íbiri biija,
13 halinde banakizi genduukirwa.
Kiri naꞌbandu ba mwiꞌkondo lyabo, nabo bagahyana ikihugo.
14 Ngiisi ábasimbahiri Nahano, ayamiri ali uluhande lwabo,
anali mu bamenyeesa ikihango kyage.
15 Amasu gaani gayamiri gali mu lola ku Nahano.
Mukuba, ye galyosa amagulu gaani mu masi.
16 E Nahano, ungebagane, maashi, unanyuvwirwe indengeerwa.
Si ngweti ngalibuuka bweneene, na ngoli ba naꞌkahumbwe.
17 Aaho! Bwo ndi mu gerania bweneene mu mutima gwani,
unjaaze mu makuba gooshi, halinde nduule ku butoge.
18 Ulolage ngiisi kwo ngola mu libuuka, ulole noꞌmukubo gwani.
Kwokwo, unjaagize ibyaha byani byoshi.
19 Ulolage ngiisi kwaꞌbagoma baani keera baluguuka!
Bali balangi bweneene, bananjombiri.
20 Keera natibitira imwawe. Kwokwo, utandeeze ishoni.
Si ungize, mu kukizi ndanga, gira ndafwe.
21 Niehe, ngwaniini, na ndi mundu woꞌkuli.
Na ngubiisiri kwoꞌmulangaaliro.
Kwokwo, ukizi ndanga, maashi!
22 E Rurema, uguluule Abahisiraheeri.
Ubalyose mu malibu gaabo gooshi.