26
E Nahano, nyamiri ndi mu kulikira ukuli kwawe
1 Izaburi ya Dahudi.
E Nahano, nyamiri ndungiini,
na ngubiisiri kwoꞌmulangaaliro, buzira kuhizaanwa.
Kwokwo, umbulanire, maashi!
2 E Nahano, utee geza íbiri mu mutima gwani,
unageze neꞌnzaliro zaani.
3 Mukuba, nduuziri mu kati koꞌrukundo lwawe,
na nyamiri ndi mu kulikira ukuli kwawe.
4 Ndali mu shiiba mbwatiiri kuguma naꞌbalyalya,
ndanali mu komeerana neꞌngengya,
5 ndanali mu bwatala na banangora-mabi.
Ikyanya abandu babi bali mu humaanana, biri mu nyaagaza.
6 E Nahano, keera nakaraba amaboko gaani,
mu kuyerekana kwo ndahiiti ubuhube.
Na buno, ngola imbere lyaꞌkatanda kaawe.
7 Ngweti ngamenyeesa abandu ngiisi kwo ukwaniini ukuyivugwa.
Na ngizi baganuulira ngiisi kwo uli mu kola ku njira ya kahebuuza.
8 E Nahano, nguuziri inyumba yawe, bwo wenyene utuuziri mwo.
Munali mwoꞌbulangashane bwawe buli.
9 Aaho! Ikyanya ugayita abanabyaha, naani utanzimiize mu kihugo.
Ee! Utanjaagize kuguma naꞌbiitani.
10 Si boohe, bagweti bagaakola amabi,
banagweti bagakizi lya ibitulire.
11 Haliko niehe, nduuziri mu kati koꞌkuli.
Ku yukwo, unyuvwirwe indengeerwa, unangize.
12 Ishando zaani ziyamiri zijingiriiri.
E Nahano, ikyanya abandu bagayija mu mihumaanano,
naani ngakizi kuyivugira mwo.