27
E Nahano, ukizi ndongoora mu njira íkwaniini
1 Izaburi ya Dahudi.
Nahano ye mulengeerwe gwani, ye nali mu ngiza.
Aaho! Nyandi ye ngaki yoboha?
Nahano ye mu ndanga, gira ndayitwe.
Nyandagi úwangaki ndeera ikyoba?
2 Abagoma baani bali banangora-mabi.
Kundu bali mu yiji ndeera, mbu banyite,
haliko bagabambaajira, banagendi gwa.
3 Kundu nangayiji teerwa niꞌzibo,
umutima gwani gutagapuupa.
Na kundu abasirikaani bingi banganzokanana,
ngayama naaho ndi kihagarusi.
4 Hali igambo liguma naaho lyo ngweti ngahuuna Nahano.
Byo ndoziizi, byo byebino:
kwo ngizi tuula mu nyumba yage isiku zaani zooshi,
na ngizi bona ngiisi kwo abuyahiri.
Mwomwo mu nyumba yage, mwo ngakizi fiitirwa ku byeꞌmwage.
5 Munali mwo agandangira ku lusiku lwaꞌmakuba,
anambishe mwiꞌheema lyage.
Ee! Aganzikamya ku lwala.
6 Kundu abagoma bagaaba bakoli nzokaniini,
haliko ngaaba nguziibwi imbere lyabo.
Na ngizi tangira Nahano ituulo lyoꞌkusiriiza mwiꞌheema lyage.
Na ngizi múbandira akabuuli, awi yiyi yiyi!
Ee ma! Ngakizi múyimbira, iri ninamúlakiza ululanga.
7 E Nahano, ikyanya ngakizi kutabaaza, ukizi nyuvwa.
Ee! Unyuvwirwe indengeerwa, unanjuvye.
8 Umutima gwani, gugweti gugambwira kwokuno:
«Ugire ugendi múganuuza.»
E Nahano, ngweti ngakuyijira.
9 Uyamiri uli mutabaazi wani.
Ku yukwo, utambishe amalanga, utananyimule ku bute bwawe.
Si nie mukozi wawe!
E Rurema, Lukiza wani, utagire mbu undahire, utananjandirire.
10 Kundu daata na maawe banganjanda,
haliko Nahano aganyakiira.
11 E Nahano, abagoma baani bagweti bagandegeera.
Ku yukwo, ukizi nyigiriza ibyeꞌmwawe,
unakizi ndongoora mu njira íkwaniini.
12 Utaleke mbwaꞌbagoma bangirage nga kwo baloziizi.
Mukuba, utumasi tweꞌbibeesha keera twanyimukira,
tunagweti tugabiika ikikando, mbu tunyite.
13 Kundu kwokwo, ndangaliiri kwo ngagenderera ukuba ho,
halinde na ndonge ukubona ubwija bwa Nahano.
14 Emwe! Mukizi lindirira Nahano.
Mukizi ba bihagarusi, iri munakizi kania umutima,
munalindirirage Nahano.