28
E Nahano, ngweti ngakuhamagala
1 Izaburi ya Dahudi.
E Nahano, we lwala lwani,
na ngweti ngakuhamagala.
Kwokwo, utambeere bitwitwi.
Mukuba, iri wangayama uli munyerere,
hali ikyanya nangavunika, na nyikire i kuzimu mu bafwiri.
2 Si ngweti ngakutabaaza mu kati kaꞌmalira.
Aaho! Ukizi nyuvwa.
Ngweti ngalambuulira amaboko Ahandu haawe Heeru bweneene.
Kwokwo, unyuvwagwe.
3 Utambanire kuguma na banangora-mabi,
balya bakozi baꞌmabi.
Si boohe, bagweti bagaadeta amagambo goꞌkulembuusa abatuulani baabo.
Kiziga mu mitima yabo, bagweti bagabashungikira amabi.
4 Balya babi, bagweti bagayifunda mu bitalaalwe.
Aaho! Byebyo bitalaalwe bibe byo ugabahembera kwo.
Bwo bayamiragi bali mu yifunda mu mabi,
gabe go ugabahemba, nga ngiisi kwo bibakwaniini.
5 Kundu uli mu kola ku bushobozi bwawe,
si boohe, batali mu kutwaza.
Ku yukwo, ugabanyanyaga haashi nga nyumba njaaja.
Utanâye shubi bayinamula.
6 Nahano ayivugwe! Mukuba, ikyanya nꞌgamúlirira,
anambonera indengeerwa, ananyuvwa.
7 Mu kati ka Nahano, mwo ndi mu longa imisi, ye nali siribo yani.
Ngweti ngakizi múlangaalira mu mutima gwani, halinde anandabaale.
Ee ma! Umutima gwani, gukoli shambiiri bweneene.
Na buno, ngamúyimbira inyimbo zoꞌbwivuge.
8 Nahano ye mu shoboleesa abandu baage.
Ye nali butibitiro bwoꞌkukiza mwami wage, ulya ye akatoola.
9 E Nahano, kwokwo ukizagye abandu baawe.
Bwo bali buhyane bwawe, ukizi bagashaanira.
Ukizi ba mungere wabo, unakizi babegeta imyaka neꞌmyakuula.