30
Nahano ye mu nzikamya
1 Ulwimbo lwoꞌkushambaalira inyumba mbyahya ya Rurema. Izaburi ya Dahudi.
2 E Nahano, ngakizi kuhuuza.
Mukuba, utaleka mbwaꞌbagoma baani bakizi mbonyoleza,
si ukanyinamula.
3 E Rurema, Nahamwitu, ikyanya nꞌgakutabaaza hiꞌgulu lyaꞌmalwazi, wanayami ngiza.
4 Kundu nâli yikiiri i kuzimu,
utakayemeera kwo nyikire yo lwoshi,
haliko, ukanzuula yo.
5 Mwe bandu ba Nahano, mukizi múyimbira.
Mukizi huuza iziina lyage, bwo liri lyeru.
6 Uburaakari bwage, bulyagagi bwa kyanya kiniini naaho.
Si ulukogo lwage lwohe, luyamiri ho mu burambe bwoshi.
Kundu umundu angalaala agweti agaalira,
si shesheezi, agashambaala ngana.* 30.6 Luka 23.46.
7 E Nahano, ikyanya nâli ki jeberiiri, nanadeta:
«Niehe, ndâye shaganibwe.
8 Neꞌkyanya wâli kizi ngashaanira,
ukanzikamya bweneene nga mugazi.»
Halikago, ikyanya ukambisha amalanga,
nanatondeera ukushenguka neꞌkyoba.
9 E Nahano, haaho nꞌgakutabaaza,
nanakuhuuna ulukogo, mu kukulirira, ti:
10 «Ikyanya ngashereera, na nyikire i kuzimu,
ugaaba walonga kamaro kaki? Si ndaako!
Neꞌkyanya abandu bagaaba keera bahinduka luvu,
ka bangaki kuyivuga?
Si batangaki menyeesania ngiisi kwo uli mwemeera!
11 E Nahano, unyuvwirize, unambonere ulukogo.
Undabaale, maashi!»
12 Ikyanya nâli kizi bululuka, na nyambale ibisheeba,
haaho, wâli kizi ndabaala.
Na buno, ngoli gweti ngakina ku bushambaale.
13 Ku yukwo, ndagaki hulikaga,
si ngakizi kuyimbira.
E Rurema, Nahamwitu, ngakizi kutangira kongwa imyaka neꞌmyakuula.