31
Mbiisiri uburambe bwani mu maboko ga Nahano
1 Imwoꞌmwimangizi waꞌbimbi. Izaburi ya Dahudi.
2 E Nahano, we ngweti ngatibitira.
Aaho! Utandekage mbu ndeezibwe ishoni.
Si uli mu gira íbikwaniini! Kwokwo, ungizagye.
3 Undege amatwiri, unayami yiji ngiza duba.
Ube we lwala lwo ngakizi yibisha mwo.
Unakizi mbeera kaaya koꞌbutibitiro, halinde ngizibwe.
4 Bwo uli lwala lwani, unagweti uganjuutira,
ukizi ndongoora, ndonge ukugingika iziina lyawe.
5 Kundu bakandegaga imibashu, utaleke kwo ngigwatwe mwo.
Si we gweti ugakizi njuutira.
6 E Nahano, nasikiiriza uburambe bwani mu maboko gaawe.
Kwokwo, bwo uli Rurema woꞌkuli, unguluule.
7 Ikyanya abandu bali mu yikumbaga imigisi mizira kamaro,
ndi mu bashomba bweneene.
E Nahano, niehe mbiisiri umulangaaliro gwani imwawe.
8 Ngakizi kushagalukira, na ngizi shambaalira urukundo lwawe.
Mukuba ikyanya nâli kizi libuuka, wanambona,
wanayuvwa ngiisi kwo nâli koli shengusiri mu mutima gwani.
9 Ku yikyo kyanya, utakambiika mu maboko goꞌmugoma wani,
si ukambisha áhali umutuula.
10 E Nahano, buno ngweti ngalibuuka bweneene.
Aaho! Unyuvwirwe indengeerwa.
Amasu gaani, keera gakakanga hiꞌgulu lyoꞌmwizingeerwe.
Na ngoli shengusiri bweneene mu mutima gwani, kiri na mu magala gaani.
11 Ulushunguti keera lwambisa imbere lya Narufu.
Imyaka yani igweti iganyota mu kugongeera.
Bwo ndi mu libuuka bweneene, imisi yani ikola bu mala.
Kiri naꞌmavuha, keera gahangalala.
12 Bwo ndi mu longa malibu mingi, abagoma bakoli gweti baganjomba.
Kiri naꞌbatuulani baani, bakola mu nnegura.
Ikyanya abiira baani bali mu mbona, bali mu yami kanguka,
banayami ndibita.
13 Bakoli nyibagiiri, ngoꞌmundu úkoli fwiri.
Na ngolaga nga nyungu íkoli jajagusiri.
14 Keera nayuvwa ngiisi kwo bagweti bagambonyoleza.
Bakoli nzokaniini, halinde na njenguke.
Bagweti bagaagira igambi libi hiꞌgulu lyani,
banakoli shungisiri mbu banyite.
15 E Nahano, kundu kwokwo, we mbiisiri kwoꞌmulangaaliro.
Na buno, ngweti ngakubwira: «We Rurema wani!»
16 Ibyanya byani, bikoli ba mu maboko gaawe.
Kundu abagoma bagweti bagambiiva,
ungizagye mu maboko gaabo.
17 Ndi mukozi wawe. Kwokwo unyerekage ubwija bwawe.
Na bwoꞌrukundo lwawe luyamiri ho, ungizagye.
18 E Nahano, keera nꞌgakutabaaza.
Kwokwo, utaleke kwo njubi kizi teezibwa ishoni.
Si banangora-mabi boohe, babe bo gazibonia!
Leka bakizi yama bali munyerere mu kuzimu.
19 Balya banangora-mabi, si bagweti bagabeesha naaho.
Kwokwo, ushwekage utunwa twabo.
Bali mu yiheemya bweneene, mu kushombereza ukuli.
20 Amiija gaawe gali gaꞌkahebuuza.
Ngiisi ábakusimbahiri, bayamiri bagabwini.
Neꞌkyanya bagweti bagakubiika kwoꞌmulangaaliro,
uli mu bagirira amiija imbere lyaꞌbandu.
21 Kundu abandu bangagira igambi libi hiꞌgulu lyabo,
banabe bali mu balegeereza,
haliko wehe, yago mabi gooshi, uli mu balanga gatabahikire.
22 Nahano ayivugwe!
Mukuba, ikyanya nâli koli kunguliirwi niꞌzibo,
akanyereka urukundo lwage lwaꞌkahebuuza.
23 Ikyanya nâli koli kangusiri hiꞌgulu lyeꞌkyoba, nanadeta:
«Ala nie! Keera wanjandaga, utagaki mbwini.»
Kundu kwokwo, nanakutabaaza,
wanayami yuvwa amalira gaani.
24 E bandu booshi ba Nahano! Mukizi múkunda.
Ee ma! Ikyanya abandu bali bemeera, ali mu balanga.
Haliko, ikyanya bagweti bagayikangaata,
ali mu bahana ku bwobwo bwikangaate bwabo.
25 Mweshi, mwe mugweti mugalangaalira Nahano. Mukizi sikama.
Ee! Mukizi kania umutima.