32
Ahiriirwi ngiisi keera úkakogwa ibyaha byage
1 Izaburi ya Dahudi.
Ahiriirwi, ngiisi keera úkakogwa ibyaha byage,
binabe bikoli tumbikiirwi.*32.1 Barumi 4.7-8.
2 Na bwo atakiri mu hendana mu mutima gwage,
yibyo byaha, Nahano atakiri mu múharuurira byo.
3 Ikyanya nâli lahiiri kwo ndali munabyaha,
nâli kizi shiiba ngweti ngagongeera-gongeera.
Yoho wee! Amavuha gaani gâli kola mu poshola bweneene.
4 Ubwakya-ubwayira, wâli kizi mbana,
halinde indege zanavunika, nga ku kyanya izuuba liri mu daarula.
5 Birya byaha byani, iri hakatama,
ndanaki gira mbu ngubishe byo,
si nanabiyilega imbere lyawe.
Nanahiga kwokuno: «Ngolaga ngayilega ibyaha byani imbere lya Nahano.»
Ikyanya nꞌgabiyilega imbere lyawe, wanangoga.
Haaho, umwama gweꞌbyaha byani gwanayami hera.
6 Kwokwo, ngiisi úkuyemiiri, akwaniini akizi kuhuuna,
ku kyanya wangaki boneka.
Iri angagira kwokwo,
kundu agaaba abindikiirwi naꞌmakuba nga mwijulire,
haliko gatagaki múdukiira.
7 E Rurema, we ngweti ngayibisha mwo.
Kwokwo, ugakizi ngiza mu makuba,
unanyijuze inyimbo zoꞌbukize.
8 Rurema adesiri kwokuno: «Ngakizi kuhindula ube mwitegeereza.
Na nguyereke injira yo ukwaniini ukukizi lenga mwo.
Na ngizi kuhanuula, iri na ngizi kutanduula.
9 Utakizi ba nga fwarasi, kandi iri kiiza kya punda.
Si byohe, bitali mu sobanukirwa,
bitanganakuyegeera, bítazi tambikwa ibyuma mu kanwa.»
10 Banangora-mabi bagweti bagalonga amakuba mingi.
Haliko, ngiisi ábabiisiri Nahano kwoꞌmulangaaliro,
boohe, ali mu kizi bakunda.
Ee ma! Lulya rukundo lwage, lutâye male.
11 Mwe musimbahiri Nahano, mukizi shagaluka.
Ee! Mukizi shambaala mu kati kaage,
iri munamúbandira akabuuli.