33
Abandu boꞌkuli bakwaniini bakizi yivuga Nahano
1 Mwe mukwaniini imbere lya Nahano,
mukizi múyimbira ku bushambaale.
Ee! Abandu boꞌkuli bakwaniini bakizi múyivuga.
2 Mukizi yivuga Nahano mu kumúlakiza ululanga,
lulya lweꞌmirya ikumi.
3 Mumúyimbire ulwimbo luhyahya.
Mukizi longeeza ululanga, iri munabanda akabuuli.
4 Igambo lya Nahano likwaniini, linali lyoꞌkuli.
Na ku byoshi byo ali mu gira, ayamiri ali mwemeera.
5 Nahano asiimiri ukubona kweꞌmaaja ziri mu twibwa ku njira íkwaniini,
anabe asiimiri bweneene amahanga gooshi.
6 Nahano akabumba igulu, mu kudeta naaho.
Kirya kyanya akalibumba, anabumba na íbiriri kwo byoshi.
7 Kiri naꞌmiiji ga mu nyaaja, akagakuumaniza kuguma.
Naꞌmiiji ágali i buziba, akagabiika mu bihinda.
8 Booshi ábali mu kihugo, bakwiriiri bakizi simbaha Nahano.
Ee! Ábali mu mahanga gooshi, bakizi múyikumba.
9 Mukuba, akakyula kweꞌkihugo kibe ho, kyanayami ba ho.
Yukwo kukyula kwage, kwanatuma kikoli sikamiri.
10 Ikyanya ibinyamahanga biri mu gira igambi,
Nahano ali mu lishaabula.
Ee! Ngiisi byo bagweti bagashungika, ali mu bihangirira.
11 Si Nahano yehe, ikyanya ali mu tegeka igambo,
liri mu yama lisikamiri halinde imyaka neꞌmyakuula!
Ngiisi byo ali mu shungika mu mutima gwage,
biyamiri ho, halinde ku bibusi byoshi.
12 Abandu beꞌkihugo kirebe bahiriirwi, ikyanya Rurema ye Nahano wabo.
Ee! Bahiriirwi, bwo ye kabatoola, kwo babe beꞌmwage.
13 Nahano úli mwiꞌgulu, ali mu langiiza
amahanga gooshi.
14 Yaho atuuziri,
ali mu lola-lola booshi ábali mu kihugo.
15 Mukuba, ye kabumba imitima yaꞌbandu booshi.
Ye nali mu yitoneesa ku byoshi byo bali mu gira.
16 Ndaaye mwami úwangayikiza, mbu bwo ahiiti abasirikaani bingi.
Ndaanayo ndwani íri mu hima, mbu bwo ye kikalage.
17 Kiri neꞌfwarasi, ikyanya bali mu zibiika kwoꞌmulangaaliro mbu zigabakiza,
kuli mu ba naaho kwa busha.
18 Si ngiisi ábayobohiri Nahano,
amasu gaage gayamiri gali mu balola.
Mukuba, babiisiri umulangaaliro ku rukundo lwage.
Na yulwo rukundo lwage, lutâye male.
19 Abandu baage, ali mu bakiza na Narufu.
Anagweti agabalanga, batayiji kengeera bahera noꞌmwena.
20 Twehe tubiisiri umulangaaliro gwitu imwa Nahano.
Mukuba, ye mu tutabaala, ye nali mu tushuutira.
21 Na bwo tubiisiri umulangaaliro kwiꞌziina lyage litaluule,
ali mu tushambaaza mu mitima yitu.
22 E Nahano, tukubiisiri kwoꞌmulangaaliro.
Aaho! Lulya rukundo lwawe, ukizi tuyereka lwo.