34
Ikyanya nꞌgatabaaza Nahano, ananjuvya
1 Izaburi ya Dahudi, ikyanya akayiloga akabamba-isire imbere lya mwami Habimereki. Neꞌkyanya uyo mwami akamúyimula, Dahudi anayigendera.
2 Ngakizi huuza Nahano isiku zooshi.
Akanwa kaani kagakizi múyivuga ngiisi kyanya.
3 Ngakizi yiyuvwa mu kati ka Nahano.
Ábagweti bagalibuuka, bagakizi yuvwa kwokwo, banashambaale.
4 Mugire tukizi huuza ubulangashane bwa Nahano kuguma,
iri tunahuuza iziina lyage.
5 Ikyanya nꞌgatabaaza Nahano, ananjuvya.
Na kundu nâli koli teezirwi neꞌkyoba kingi,
haliko, akakindyokeza kyoshi.
6 Ngiisi ábali mu langaalira Nahano, bakoli keyengiini,
batanâye boneke kweꞌshoni.
7 Kundu ndi mukeni, nꞌgatabaaza Nahano, ananyuvwa,
anangiza mu makuba gaani gooshi.
8 Ikyanya abandu bali mu ba basimbahiri Nahano,
umuganda wage ali mu balangaalira,
anabakingire, halinde banakizibwe.
9 Mutee geregeza Nahano, lyo mubona kwo ali mwija bweneene.
Bahiriirwi ngiisi ábamúbiisiri kwoꞌmulangaaliro.
10 Mwe bandu ba Nahano, mukizi músimbaha.
Mukuba, ngiisi ábamúsimbahiri, ndaabyo babuziri.
11 Kiri neꞌndare, hali ikyanya iri mu bula byo igaalya,
inagende ijojobiiri.
Haliko abandu ba Nahano boohe, ikyanya bali mu múlooza,
ndaakyo kindu kiija kyo bali mu bula.
12 E baana baani, muyije munyuvwirize.
Ngamúyigiriza ngiisi kwo mugakizi gingika Nahano.
13 Mu kati kiinyu, ka hali úloziizi ukutuula bwija?
Anabe ali mu yifwija ukubona isiku nyingi nyiija?* 34.13-17 1 Peturu 3.10-12.
14 Kwokwo, akwiriiri akizi hangirira akanwa kaage,
katakizi deta amabi, atanakizi beesha.
15 Atwikirage ku mabi, anakizi gira amiija.
Akizi fiitirwa ku byangaleeta umutuula, binabe byo agakizi kulikiriza.
16 Mukuba, amasu ga Nahano, gali mu lola ku bandu ábali mu gira íbikwaniini.
Neꞌkyanya bali mu mútabaaza, ali mu bayuvwa.
17 Si abakozi baꞌmabi boohe, ali mu bahindulira ingoto,
halinde batanakizi ki kengeerwa mu kihugo.
18 Ngiisi ábakwaniini, ikyanya bagweti bagatabaaza Nahano, ali mu bayuvwa,
anabakize mu makuba gaabo gooshi.
19 Ngiisi ábavunisiri umutima, Nahano ali mu bakuya-kuya.
Neꞌkyanya bali mu yihebuura, ali mu bakiza.
20 Umundu úkwaniini, kundu angalonga amakuba mingi,
haliko Nahano ali mu múkiza mu gooshi.
21 Nahano ali mu langa amavuha gaage gooshi,
hatagirage kiri neꞌliguma írigavunika.† 34.21 Kulyoka 12.46; Muharuuro 9.12; Yohana 19.36.
22 Banangora-mabi, amabi gaabo gali mu bayitiisa.
Ikyanya bali mu haganaga na ábakwaniini,
bali mu twirwa ulubaaja lwoꞌkuhanwa.
23 Haliko, ngiisi ábali mu kolera Nahano, boohe, ali mu baguluula.
Ikyanya bali mu tibitira imwage, ndaaye ye agaahana.