37
Ukizi biika umulangaaliro imwa Nahano
Izaburi ya Dahudi.
Utakizi gerania hiꞌgulu lya banangora-mabi,
utanakizi gwatwa noꞌluugi hiꞌgulu lyabo.
Si bagakuluuduka nga kishuka,
banahangalale nga byasi.
 
Haliko wehe, ukizi biika umulangaaliro imwa Nahano,
unakizi gira amiija.
Kwokwo lyo ulonga ukutuula mu kihugo,
unabe nga kibuzi íkiragiiri mu ndagiriro mu mutuula.
Ukizi shagaluka mu kati ka Nahano,
halinde akuheereze ngiisi byo usiimiri mu mutima gwawe.
 
Ngiisi byo ugakizi gira, ukizi bisikiiriza Nahano,
unakizi múbiika kwoꞌmulangaaliro, halinde akutabaale.
Agaagira ukuli kwawe kukizi tanguula nga lukula.
Neꞌkyanya ugaatwa ulubaaja, ugakizi langashana ngiꞌzuuba lya kalenge-renge.
 
Ukizi tubereza imbere lya Nahano,
unakizi múlindirira ku bwigenderezi.
Utakizi bona buligo, mbu bwaꞌbandu babi bagweti bagagenduukirwa.
Utanakizi yoboha, mbu bwo bakoleesa amagambi gaabo.
 
Ukizi yihangirira, utayiji kengeera waraakara.
Utanamirwe neꞌngerania,
bweꞌngerania ziri mu yingiza umundu mu mabi naaho.
Ngiisi banangora-mabi, bagaki twibwa mu kihugo.
Haliko ábabiisiri Nahano kwoꞌmulangaaliro, boohe, bagakihyana.
10 Ee! Ha nyuma hiniini, banangora-mabi batagaki ba ho.
Kundu mwangagendi baloogeza ho bashuba, batagaki boneka.
11 Haliko abatuudu, boohe, bo bagahaabwa ikihugo,
banakishagalukire mu kati koꞌmutuula.
 
12 Balya banangora-mabi, bali mu gira igambi libi hiꞌgulu lya ábakwaniini,
iri banabakaajira imihondo.
13 Kundu kwokwo, Nahano ali mu bashekeereza,
bwo ayiji kwo bakola bagaahanwa naaho.
 
14 Balya banangora-mabi bagweti bagayomola ingooti, iri banafwora neꞌmiheto,
gira bayite abakeni, balya ábatashobwiri,
banaminike kiri naꞌbandu ábakwaniini.
15 Kundu kwokwo, yizo ngooti zaabo, bagaziyiyomeka boonyene.
Neꞌmiheto yabo, igavunwa-vunwa.
 
16 Umundu úkwaniini, kundu angaba ali neꞌbindu bigerwa naaho,
haliko byo bihimiri ubugale bwa banangora-mabi.
17 Mukuba, yabo banangora-mabi bagaki shaabulwa.
Haliko ngiisi ábakwaniini boohe, Nahano ali mu basikamya.
 
18 Ngiisi abazira buhube, Nahano ali mu bahahalira.
Ubuhyane bwabo bugayama ho imyaka neꞌmyakuula.
19 Kundu bangaba balyagagi naꞌmakuba, haliko batagaafwa.
Kiri na mu siku zoꞌmwena, bagaki longa ibyokulya.
 
20 Si balya banangora-mabi boohe, bagaahera.
Abagoma ba Nahano bagayumaguka ngoꞌtwaso mu ndalo,
bananyerere nga kyusi.
 
21 Yabo banangora-mabi bali mu kaaba, si batali mu kabuula.
Haliko umundu úkwaniini, yehe ali mu kaabana ku mutima úgushenguusiri.
22 Ngiisi bo Nahano ali mu gashaanira, bo bagahyana ikihugo.
Haliko, ngiisi bo agweti agadaaka, boohe, bagashereezibwa.
23 Umundu, iri agakizi simiisa Nahano,
yoyo, ye Nahano ali mu yereka ngiisi ho agagenda.
24 Na kundu angasiitara, haliko atangagwa.
Mukuba, Nahano ali mu músikamya noꞌkuboko kwage.
 
25 Ukulyokera ubusore bwani, halinde ukuhisa mu bushaaja,
ndazindi bona umundu mwija, mbu ajandiriirwi na Rurema.
Ndanazindi bona abaana baage, kwo bagendi huuna ibyokulya.
26 Yabo bandu bali mu kaabana ku mutima úgushenguusiri.
Kiri naꞌbaana baage nabo, banakizi gashaanirwa.
 
27 Kwokwo, utwikirage ku mabi, unakizi gira amiija,
halinde lyo utuula isiku nyingi hano mu kihugo.
28 Mukuba, ngiisi ábakwaniini, Nahano ali mu ba abakuuziri.
Na bwo bali bemeera, atagabajanda.
 
Agagenderera ukukizi balanga imyaka neꞌmyakuula.
Haliko, banangora-mabi boohe, agashereeza ikibusi kyabo.
29 Ngiisi ábakwaniini, bo bagahyana ikihugo,
banakituule mwo imyaka neꞌmyakuula.
 
30 Umundu woꞌkuli, amagambo gaage gali goꞌbwitegeereze,
ganakwaniini.
31 Ulubaaja lwa Rurema luyamiri luli mu mutima gwage,
ataganatyerera mu njira.
 
32 Haliko balya banangora-mabi boohe,
bali mu tegeeraga ábakwaniini, mu kulooza mbu babayite.
33 Kundu kwokwo, Nahano atagabajandirira,
mbu bayingire mu maboko gaabo.
Neꞌkyanya bagatwirwa ulubaaja,
atagaaleka mbu bahanwe.
 
34 Ukizi langaalira Nahano, unakizi múkulikira.
Kwokwo, lyo agakukuza, halinde unatwale ikihugo.
Haliko, balya banangora-mabi boohe, ugaabona ngiisi kwo bashaazibwa mwo.
 
35 Balya banangora-mabi, nꞌgabona ngiisi kwo bali bihagarusi bweneene,
banagangiiri nga kiti íkimeziri mu luvu lwija.
36 Haliko ha nyuma, iri nꞌgashubi halenga, ndanaki babona.
Kundu nꞌgagira mbu nibalooze, batanashubi boneka.
 
37 Mukizi yitoneesa ku bandu ábakwaniini, balya ábatahiiti ubuhube.
Mukuba, ngiisi ábakuuziri umutuula, bagaalama.
38 Haliko abanabyaha, boohe, bagashereezibwa lwoshi.
Na mu kuheza, bagasivibwa.
 
39 Abandu boꞌkuli, Nahano ali mu bakiza.
Neꞌkyanya bali mu longa amakuba, ye gaaba busikamiro bwabo.
40 Yabo bandu, Nahano agweti agabatabaala, anali mu bakiza.
Ali mu bakiza mu banangora-mabi,
halinde banaguluulwe.
Na íbitumiri ali mu bakiza, bwo bali mu mútibitira.