38
Ibyaha byani, keera byanjengeeza bweneene
1 Izaburi ya Dahudi, kwo Rurema akizi múkengeera.
2 E Nahano, utakizi nyerekeza ku kyanya ukoli rakiiri,
utanambanage ku bute bwawe.
3 Si imyambi yawe, igweti igandumita!
Ukuboko kwawe, kunangandamiiri.
4 Ee! Bwo nagira ikyaha, ukoli ndakariiri,
kinatume amagala gaani gatakiri magumaana.
Kiri naꞌmavuha gaani gatakiri mwoꞌmutuula.
5 Ikyaha kyani kigweti kigambwikira,
kinanzidohiiri nga muteekerwa muzito.
6 Ikyanya nꞌgagiraga ikyaha,
lyo nꞌgahwijikala bweneene.
Kyanatuma ibihando byani byâli koli vuuziri,
byanakizi baya bweneene.
7 Ngweti ngakunanguka halinde haashi, keera nanahimba.
Ubwakya-ubwayira, ndi mu genda njengiirwi.
8 Iningo zeꞌbirumbu byani zikalaliirwi neꞌshuushira.
Mu magala gaani, ndaabwo bugumaana úbuli mwo.
9 Keera nahimbuukira. Neꞌndege zaani zikoli teziri.
Yayewe wee! Si ngoli hanamiri bweneene mu mutima gwani!
10 E Nahano, ngiisi kwo ndoziizi, kuli mu ba ku bweranyange imbere lyawe.
Kiri noꞌkugongeera kwani, kutabishamiri imwawe.
11 Umutima gwani gukolaga mu puupa. Neꞌmisi yani keera yatera.
Kiri naꞌmasu gaani gakoli fwifwitiiri.
12 Yago malibu gaani, go gatumiri abiira baani, kiri naꞌbakundwa baani,
bakola mu nyiyeka.
Kiri neꞌmbaga yani bakola mu nyisunga.
13 Ngiisi ábaloziizi ukunyita, keera bategaga imibashu.
Na ábaloziizi ukungomeeresa,
bagweti bagashungika ngiisi kwo baganjereeza.
Bali mu shiiba umulege-rege gwoshi,
bagweti bagaagira igambi libi hiꞌgulu lyani.
14 Ndakiri mu yuvwa, ndanakiri mu deta.
Si ngola nga bitwitwi, na ngola nga kimeme.
15 Na bwo ngolaga nga mundu útakiri mu yuvwa,
ikyanya ndi mu buuzibwa, ndali mu shuvya.
16 E Rurema Nahamwitu, we mbiisiri kwoꞌmulangaaliro.
Aaho! Unjuvyagye!
17 Nꞌgakuhuuna kwokuno: «E Rurema, ikyanya natyerera,
utaleke kwo bakizi mbonyoleza, mbu honyo!
Batanalonge ukuyidundulika hiꞌgulu lyani.»
18 Nyamiri ndyaniirwi isiku nyingi,
na ngola ngatibukira haashi.
19 Ku yukwo, ngola mu yilega amabi gaani.
Ee ma! Ibyaha byani, keera byanjengeeza bweneene.
20 Abagoma baani balyagagi katundu, banali neꞌmisi,
banagweti baganjombera ubusha.
21 Ikyanya ngweti ngabagirira amiija, boohe, bali mu ngalulira amabi,
banagweti bagakizi mbeeshera.
22 E Rurema Nahamwitu, utanjande maashi,
utananyisunge hala.
23 E Nahano, si uli Lukiza wani.
Aaho! Uvwarukage, uyiji ndabaala duba.