39
Uburambe bwani buli mu suula umulindi
1 Imwoꞌmwimangizi waꞌbimbi. Izaburi ya Dahudi. Luli mu yimbwa ngeꞌnyimbo za Yedutuni.* 39.1 Yedutuni Mwimangizi muguma waꞌbimbi ábakayimbira Rurema ku kyanya kya mwami Dahudi. 1 Kutondobola 25.1, 3, 6.
2 Nꞌgadeta: «Ngiisi byo ndi mu gira, ngabiloleekeza ku bwitonde,
gira akanwa kaani katakengeere kadeta íbitali nga byo.
Ikyanya banangora-mabi bagaaba bangola ha butambi,
ngayitonda mu kudeta.»
3 Kundu kwokwo, ikyanya nâli kizi yihulikira,
buzira kudeta kiri niꞌgambo liija, lyo nꞌgashenguka bweneene.
4 Iri nꞌgaba ndoniri kwokwo,
umutima gwani gwanahiira bweneene.
Emwe! Nâli yiyuvwiti ngoꞌmuliro gugweti guganziriiza.
Kyanatuma ngaadeta kwokuno:
5 «E Nahano, ummenyeese ngiisi kwoꞌburambe bwani buli mu suula umulindi.
Unanyereke ngiisi kwo bugaahera.
Umbwire ulusiku lwo ngaafwa kwo.
6 Isiku zaani, si ziri niini bweneene, zinakwiziri ha fune.
Ee! Imyaka yani yoshi, iri nga ndaayo.
Ubulamu bwoꞌmundu, buli mu lenga nga úwayisa umuuka liguma naaho.»
7 Ngiisi mundu agweti agalenga naaho, nga kimbehwa.
Kundu ali mu yihunguula-hunguula mu kukizi hahalira amagoorwa gaage,
haliko byoshi biri mu ba bya busha naaho.
Kundu angaba ali mu yilundira akanyamwala keꞌbindu,
si yibyo byoshi, atazi menya bigayiji ba byeꞌmwa nyandi.
8 E Nahano, buno biki byo nangaki looza?
Si wehe we mbiisiri kwoꞌmulangaaliro!
9 Ungize mu bino byaha byani byoshi,
gira abahwija batayiji njekeereza.
10 Si we katuma ngola mu hanwa kwoku.
Ku yukwo, ndagaki deta.
Kiri noꞌkuyigula akanwa kaani, ndaloziizi.
11 Kwokwo, utaki shubi mbana.
Si ibihano byawe, keera byanduhya!
12 Ikyanya abandu bali mu kizi huba, uli mu bakanukira, unabahane.
Na kundu bangalongaga ubugale,
haliko ibihwi-hwi biri mu bufuuha kwo, bunamale.
Ngiisi mundu ali nga muuka naaho, úguli mu lengaga.
13 E Nahano, uyuvwagwe ngiisi kwo ngweti ngakuhuuna.
Ee! Uyuvwirize ngiisi kwo ndi mu kulirira.
Ikyanya wayuvwa amalira gaani, utayigire nga bitwitwi.
Si ngoli tuuziri nga muhinjuka.
Nduuziri nga kinyamahanga,
nga kwo bashokuluza biitu nabo bâli tuuziri.
14 Kwokwo, utakizi nvutulira amasu.
Haliko, ikyanya ngiri ho, uleke njubi shambaala.
Mukuba, masaasa atabukwa ngalyoka hano, ndaganaki boneka.
*39:1 39.1 Yedutuni Mwimangizi muguma waꞌbimbi ábakayimbira Rurema ku kyanya kya mwami Dahudi. 1 Kutondobola 25.1, 3, 6.