40
Byo Nahano akangirira, bikasoomeza abandu bingi
1 Imwoꞌmwimangizi waꞌbimbi. Izaburi ya Dahudi.
2-3 Ikyanya nâli yikiiri mu kirimbi-rimbi,
kyâli riiri mweꞌbidaka byoꞌmusaayo.
Kundu kwokwo, nâli rindiriiri Nahano ku bwigenderezi.
Neꞌkyanya nꞌgamúlirira, ananyuvwa.
Ee ma! Anandyosa mwo, ananyimangika ku lwala.
Kwokwo, amagulu gaani gakoli sikamiri.
4 Na buno, Rurema witu akoli mbeziizi ulwimbo luhyahya.
Luli lwimbo lwoꞌkukizi múyivuga.
Yibyo byo Nahano akagira, abandu bingi bagabibona,
banasoomerwe, banamúbiike kwoꞌmulangaaliro.
5 Ahiriirwi ngiisi úbiisiri Nahano kwoꞌmulangaaliro.
Uyo mundu atagweti agaalola ku banabwikangaate,
balya ábali mu yifunda mu byeꞌmizimu.
6 E Rurema, Nahamwitu, keera wagira ibisoomeza bingi bweneene.
Ngiisi byo ukatushungikira, biri katundu.
Ndaaye úwangashobola ukubitondobola.
Kundu nangagira mbu mbidete, ndangahasha,
bwo biluguusiri bweneene.
7 Utakalooza kwo ngizi kutangira amatuulo goꞌkusiriiza,
kandi iri gandi-gandi matuulo.
Utanaloziizi ukutangirwa amatuulo goꞌkukogwa ibyaha.
Si ukanyigula amatwiri, lyo ngizi kuyuvwa.
8 Haaho nanadeta: «Keera nayija! Ngolaga hano, e waliha!
Ibyeꞌmwani, bikoli yandisirwi mu kitaabo kyawe.
9 E Rurema wani, ngiisi byo uloziizi, byebyo byo naani ndoziizi ukugira.
Imaaja zaawe, ngoli zisingwiri mu mutima gwani.*40.9-11 Baheburaniya 10.5-6.»
10 E Nahano, ngiisi íbikwaniini, ndi mu bimenyeesa
mu mihumaanano mihamu yaꞌbandu baawe.
Ndanâye hulike, nga kwo uyiji bwija.
11 Amagambo gaawe nga kwo gakwaniini, ndâye galeke
mbu gaherere mu mutima gwani.
Si ngweti ngagamenyeesa mu mihumaanano mihamu!
Balya bandu, ndangababisha kwo we Lukiza mwemeera.
Ndanganaleka ukukizi bamenyeesa kwo uli mwene urukundo, na mwene ukuli.
12 E Nahano, utanyimage ulukogo lwawe, maashi!
Si urukundo lwawe, noꞌkuli kwawe, bikizi njuutira.
13 Ngolagi sokaniinwi naꞌmakuba mingi.
Na bweꞌbyaha byani bikoli ngwasiri, ndaki bwini.
Ibyaha byani bikolaga kandaharuurwa,
ukuhima umushaku úguli kwiꞌtwe lyani.
Umutima gwani gukoli vunisiri.
14 E Nahano, ungizagye we kongwa!
Uyiji ndabaala duba.
15 Ngiisi ábaloziizi ukunyita, ubabonie ishoni,
halinde banayagagale.
Ee! Ngiisi ábayifwijiri kwo njereere,
ubagalule, halinde bateezibwe ishoni.
16 Ngiisi ábagweti bagambonyoleza,
basigale bashengusiri neꞌshoni zaabo boonyene.
17 Haliko, ngiisi ábagweti bagakulooza,
boohe, bakizi shambaala, iri banashagaluka mu kati kaawe.
Ngiisi ábakuuziri ubukize bwawe,
bakizi deta kwokuno: «Nahano akizi huuzibwa!»
18 Kundu kwokwo, niehe ngiri mukeni, na ngi goozirwi.
Haliko, Nahano ali mu kizi ngengeera.
Ee! We mu ndabaala, we na Lukiza wani.
Kwokwo, utaki tindage.