41
Mahuuno goꞌmulwazi
1 Imwoꞌmwimangizi waꞌbimbi. Izaburi ya Dahudi
2 Ahiriirwi, ngiisi úgweti úgahahalira ábatashobwiri.
Mukuba, ikyanya agaaba akolaga mu makuba,
naye, Nahano agamúkiza.
3 Nahano agakizi músiikira, halinde akizi yama ho.
Atagaaleka kwaꞌbagoma bamúgire nga kwo baloziizi.
Si agakizi múgashaanira hano mu kihugo.
4 Kiri neꞌkyanya agaaba alwaziri,
Nahano agamúkiza, anamúyinamule ku ngingo.
5 Nꞌgadeta: «E Nahano, keera nꞌgayifunda mu byaha imbere lyawe.
Kwokwo, unyuvwirwe indengeerwa, unangize.»
6 Si abagoma baani bagweti baganyigambira kwokuno:
«Aahago! Uyu, agaafwa lihi, halinde azimiire lwoshi?»
7 Ehee! Ikyanya bagweti bagayiji ndanduula,
bali mu kizi deta naaho amagambo goꞌbulyalya.
Bagweti bagakuumania amagambo mabi-mabi.
Neꞌkyanya bali mu hulukira imbuga,
banagende bagweti bagagakwiza mu bandi.
8 Abagoma baani booshi, bagweti bagangamba ku kahwehwe,
iri banadeta amagambo mabi hiꞌgulu lyani.
9 Bagweti bagakizi deta: «Si keera ubulwazi bwamúkayira bweneene!
Ngiisi ho alambamiri, atâye ki havyuke.»
10 Kiri na mwira wani wa vyuka-ngwejere,
anali ye tushuba mu shangiira umukate,
naye keera anyihindulira.
11 E Nahano, unyuvwirwe indengeerwa.
Unangize, gira ndonge ukugendi bayihoola.
12 Nyiji bwija kwo unziimiri.
Utanali mu leka abagoma mbu bayihaye hiꞌgulu lyani.
13 Bwo ndi mundu woꞌkuli, ugweti uganjiga.
Tuganayamanwa imyaka neꞌmyakuula.
14 Nahano Rurema waꞌBahisiraheeri, akizi yivugwa imyaka neꞌmyakuula.
Bikizi ba kwokwo.