Umuteeko gwa kabiri
42
(Zaburi 42–72)
Rurema ye tumiri ndi mugumaana
1 Imwoꞌmwimangizi waꞌbimbi. Amigirizo gaꞌbaana ba Koora.
2 E Rurema, nga kweꞌmbongo iri mu ba ihemagiiri mu kulooza amiiji mu musima,
kwo na naani ndi mu kizi kuyifwija.
3 Umutima gwani guli neꞌnyoota hiꞌgulu lya Rurema, úli mugumaana.
Aaho! Tugagendi bonaana twe naye mangoki?
4 Ubushigi niꞌzuuba, imigenge naaho, byo bikola byokulya byani.
Ngiisi lusiku bali mu mbuuza:
«Ewe! Ulya Rurema wawe, alyagagi hayi?»
5 Buno, ngola ngadeteerera íbiri mu mutima gwani.
Ngi kengiiri ngiisi kwo nâli kizi genda ndongwiri abandu bingi,
mu kugendi yingira mu nyumba ya Rurema.
Ee! Tweshi twâli kizi kutangira kongwa, iri tunashagalukira kuguma,
noꞌkubanda utubuuli.
6 E mutima gwani, kituma kikagi ukoli jengiirwi,
unakoli shengusiri?
Ubiikage umulangaaliro gwawe imwa Rurema.
Ye Lukiza wani, ye na Rurema wani.
Ee ma! Ngaki shubi múyivuga.
7 E Rurema wani, si keera nashenguka!
Kundu kwokwo, ngukumbwiri.
Ubutabaazi bwawe, bulyosiri mu mbande zeꞌYorodaani,
na mu migazi Herimooni, na mu yeꞌMizaari.
8 Ngweti ngalongaga amakuba bweneene, na nyiyuvwe
nga shalalo ígweti igalulumba-lulumba, inanjalalire kwo.
Ee! Ngolaga nga mbindikiirwi neꞌmidunda.
9 Mwiꞌzuuba, Nahano agweti aganyereka urukundo.
Na bushigi, ndi mu longa ulwimbo lwoꞌkukizi múyivuga.
Ye tumiri ndi mugumaana,
kinatume ngakizi múhuuna.
10 Bwo Rurema ye lwala lwani, ngweti ngamúbwira:
Aahago! Kituma kiki wanyibagira?
Kituma kikagi wandekeerera ngizi jeba-jeba, iri ninalira?
Si abagoma bagweti bagandibuza bweneene!
11 Bagweti baganyamiriza.
Banali mu shiiba bagweti bagambuuza:
«Ewe! Ulya Rurema wawe, alyagagi hayi?»
Kwokwo, nayuvwa mu mavuha gaani kwo ngoli fwiri.
12 E mutima gwani! Kituma kikagi ukoli jengiirwi,
unakoli shengusiri?
Ubiikage umulangaaliro gwawe imwa Rurema.
Ye mu ngiza, ye na Rurema wani.
Ee ma! Ngaki shubi múyivuga.