44
Tugweti tugayihaya mu kati ka Rurema
1 Imwoꞌmwimangizi waꞌbimbi. Amigirizo gaꞌbaana ba Koora.
2 E Rurema, bashokuluza biitu bakatuganuulira
ngiisi kwo wâli kizi bagirira ku kyanya kyabo.
Yago magambo gooshi, keera tukagayiyuvwirwa.
3 Wâli kizi koleesa ubushobozi bwawe,
mu kuyimula abandu beꞌmahanga,
wanabahaniiriza bweneene.
Ahandu haabo, wanahabiika bashokuluza biitu, wanakizi bagenduusa.
4 Ikyanya bakanyaga ikihugo, kutâli riiri ku njira yeꞌngooti zaabo.
Kutanâli riiri, mbu bwo bahiiti imisi.
Halikago, bakahima ku bushobozi bwawe.
Wâli bakuuziri.
Noꞌbulangashane bwa ku malanga gaawe, bwâli kizi bamolekera.
5 Uli Rurema wani, unali mwami wani.
We mu kyula, halinde beene Yakobo banakizi hima.
6 Kuli ku misi yawe, kwo tuli mu hima abagoma biitu.
Tuli mu bakandagira kwiꞌziina lyawe.
7 Ndabiisiri umulangaaliro ku muheto gwani.
Kiri neꞌngooti yani, itali yo yangatuma ngaahima.
8 Haliko, we katuhimira abagoma biitu,
halinde banateezibwa ishoni.
9 Tuli mu shiiba tugweti tugayihaya mu kati ka Rurema.
Tuganagenderera ukukizi yivuga iziina lyawe imyaka neꞌmyakuula.
10 Si buno, keera watujandaga, wanatubonia ishoni,
utanaki gweti ugagenda kuguma naꞌbasirikaani biitu!
11 Ukatuyimula imbere lyaꞌbagoma biitu,
kyanatuma bagatushahula ibindu.
12 Ukatutangaga nga bibuzi íbigagendi baagwa,
wanatushabulira hala mu mahanga.
13 Ukatuguliisa, twe bandu baawe, ku bindu biniini naaho.
Ee! Si ndaako kamaro ko ukabilonga mwo!
14 Ukaleka abatuulani biitu bakizi tuyamiriza.
Bâli kizi tuhonyoleza, iri banatutyoza.
15 Ee! Ibinyamahanga bikoli gweti bigatutyoza,
iri binatuzuugiza amatwe.
16 Ndi mu mala umulege-rege gwoshi ndeteriirwi.
Amalanga gaani gayijwiri ishoni.
17 Bagweti bagandukiiriza, iri banannegura bweneene.
Yabo bagoma bagweti bagaahiga naaho kwo baganyihoola.
18 Kundu tutazindi kuyibagira, tutanazindi hongola ikihango kyawe,
haliko yibi byoshi keera byatutibukira kwo.
19 Imitima yitu itazindi kuhinduka,
tutanazindi janda injira yawe.
20 Kundu kwokwo, wanatujigira mwiꞌshamba,
halinde twanagendi janganulwa-janganulwa neꞌmirunga.
Wanatulekera mu kihulu kya namudidi.
21 E Rurema witu, túkibe tukayibagira iziina lyawe,
tunatibitire imweꞌmigisi,
22 nga keera ukamenya.
Mukuba, we mu menya íbiyifundereziizi mu mitima yitu.
23 Hiꞌgulu lyawe, tuli mu girwa nga bibuzi íbikola bigagendi baagwa.
Bali mu tuharuura nga bibuzi byoꞌkugendi yitwa naaho.* 44.23 Barumi 8.36.
24 E Nahano, kituma kiki uki gwejiiri?
Uvyukage maashi! Utaleke tuteereke imyaka neꞌmyakuula.
25 Kituma kiki watubisha amalanga gaawe,
unakoli yibagiiri amagoorwa giitu, naꞌmalibu giitu?
26 Tukagoka, halinde tukoli lambamiri mu luvu.
Amalanga giitu, tugayisiizi halinde kwiꞌdaho.
27 Uyimukage, maashi, uyiji tutabaala.
Bwo uyamiri ukuuziri abandu bweneene,
uyiji tukiza.