45
Inyimbo zoꞌmulengo
1 Imwoꞌmwimangizi waꞌbimbi. Amigirizo gaꞌbaana ba Koora. Ulwimbo lwoꞌbugeni.
2 Umutima gwani guyijwiri mwaꞌmagambo manunu-manunu.
Kwokwo, ngola ngayimbira mwami inyimbo zoꞌmulengo.
Yizo nyimbo, ululimi lwani lugazirongorora bwija,
ngoꞌmundu úyiji bweneene ukuyandika.
3 Ewe! Si ubuyahiri bweneene, ukuhima abashosi booshi!
Na mu kudeta, ugweti ugarongorora amagambo manunu.
Ee ma! Rurema akugashaniiri, halinde imyaka neꞌmyakuula.
4 E ndwani, ugirage uhagate ingooti yawe.
Ukizi gingikwa, iri unayerekana ubulangashane bwawe.
5 Ngahwe! Ushokolage injira, uli ku fwarasi, unakizi gendi gira ibyeꞌkisoomeza.
Ugendi lwira ukuli, noꞌbutuudu, na íbikwaniini.
Ukoleese ubushobozi bwawe, mu kugendi hima.
6 E mwami, imyambi yawe kwo iri myugi,
ikizi beruuza mu mitima yaꞌbagoma baawe.
Abandu baꞌmahanga, bakizi fukama mu magulu gaawe.
7 E Rurema, ikitumbi kyawe kigayama ho imyaka neꞌmyakuula.
Uganakizi twala ku njira íkwaniini.
8 Ukuuziri íbikwaniini. Haliko amabi goohe, ugashombiri.
Kyo kikatuma Rurema wawe akakukuza, ube hiꞌgulu lyaꞌbiinyu.*45.8-10 Baheburaniya 1.8-9.
Anakushiiga amavuta mu kati koꞌbushambaale.
9 Ibyambalwa byawe biri noꞌmuhongolo mwija gwaꞌmalaasi na gweꞌhuudi,
na gwoꞌmudalasiini.
Ubwatiiri mu nyumba ílimbisiibwi naꞌmahembe geꞌnjovu.
Banali mu kushambaaza neꞌnyimbo íziri mu lasibwa mu binubi.
10 Mu bagweti bagakukunga, muli abaluzi-nyere.
Noꞌluhande lwawe lweꞌlulyo, hayimaaziri umugoli,
alimbisiibwi noꞌbungeni-ngeni úbukagirwa mu nooro yeꞌHofiiri.
11 E muluzi-nyere, uyuvwirize amagambo gaani, unagayitoneese kwo.
Uyibagirage abeꞌmwinyu, kiri na beene winyu.
12 Si ubuyahiri ngana-ngana! Kinatumiri mwami akuhemukiiri.
Ku yukwo, ukizi músimbaha. Mukuba, ye yibalo.
13 Abagale beꞌTiiro bagayiji kutengula,
banakizi looza kwo ubatabaale.
14 Umuluzi-nyere agweti agakulindirira mu kisiika kyage.
Ayambiiti ikanju lyeꞌndobe-ndobe zeꞌnooro.
15 Ee! Akoli yambiiti ibyambalwa byeꞌndobe-ndobe.
Anakola mu genda, aherekeziibwi naꞌbanyere bingi,
bagweti bagamútwala mu mwa mwami.
16 Ikyanya bagweti bagarongoorwa imunda mwami,
bali mu shambaala ngana-ngana ku kisegengo.
Kwokwo, bagweti bagayingira mu kajumiro.
17 E mwami! Abaluzi baawe bo bagayima ahandu ha bashokuluza baabo.
We gabayimika, babe bo bagatwala mu kihugo kyoshi.
18 Ngaagira iziina lyawe likizi huuzibwa mu bibusi byoshi,
halinde abandu baꞌmahanga gooshi bakizi kuyivuga imyaka neꞌmyakuula.