47
Nahano ali hiꞌgulu lya byoshi
1 Imwoꞌmwimangizi waꞌbimbi. Izaburi yaꞌbaana ba Koora.
2 Mwe bandu baꞌmahanga gooshi, mukomere Rurema amagasha.
Mumúbandire akabuuli, iri munashambaala ngana.
3 Mukuba Nahano alyagagi hiꞌgulu lya byoshi.
Anali ye mwami mukulu hiꞌgulu lyaꞌmahanga gooshi.
4 Akatuhimira ibinyamahanga,
anabibiika mwiꞌdako lyaꞌmagulu giitu.
5 Kino kihugo kyo tutuuziri mwo,
Nahano ye katutoolera kyo.
Mukuba, twe beene Yakobo,
anali mu yiyuvwa hiꞌgulu liitu, anatusiimiri.
6 Rurema akoli shoniri ku kitumbi kyage kyoꞌbwami.
Abandu bagweti bagamúbandira akabuuli, awi yiyi yiyi!
Neꞌbibuga binadihirizibwe.
7 Mukizi yimbira Rurema inyimbo zoꞌbwivuge.
Ee! Mukizi múyimbira.
Mukizi yimbira mwami inyimbo zoꞌbwivuge.
Ee maashi! Mukizi múyimbira.
8 Mukuba Rurema ye mwami waꞌmahanga gooshi.
Ku yukwo, mukizi múyimbiraga inyimbo zoꞌbwivuge.
9 Rurema ye mwami hiꞌgulu lyaꞌbandu baꞌmahanga gooshi.
Abwatiiri ku kitumbi kyage kyeru kyoꞌbwami.
10 Abakulu baꞌmahanga keera bakuumana,
banatuyibiika kwo, mu kuyikumba Rurema wa Hiburahimu.
Ee ma! Abaami beꞌkihugo bali beꞌmwa Rurema.
Yehe, ye mu huuzibwa bweneene.