48
Rurema atuuziri mu kaaya keꞌSayuni
Izaburi yaꞌbaana ba Koora.
Nahano ali mukulu bweneene.
Anakwaniini ukukizi huuzibwa mu kaaya keꞌSayuni, kwo kayubasirwi ku mugazi mweru.
Emwe! Yugwo mugazi, guli gweꞌmwa Rurema.
Guli mula bweneene, gunabuyahiri ngana-ngana.
Guli gweꞌmwa mwami mukulu,
gunagweti gugashambaaza amahanga gooshi.
Yako kaaya, Rurema yenyene atuuziri mu nyumba zaako.
Anayijikiini kwo ye luzitiro lwako.
 
Yako kaaya keꞌSayuni, abaami bâli koli kuumaniri kuguma,
gira bagendi kateera.
Haliko, iri bakakabonaga, banasoomerwa ngana.
Banagwatwa neꞌkyoba, banayami puumuka.
Bâli koli jugumiri,
banalyanirwa ngoꞌmukazi úgweti úgaliibwa noꞌmukero.
E Rurema! Kiri naꞌmashuba geꞌTarasisi, ukagashereeza lwoshi,
mu kukoleesa ikihuhuuta ukulyoka isheere.
 
Ngiisi byo tukayuvwa hiꞌgulu lya Sayuni, tukabiyibonera twenyene.
Kali kaaya ka Rurema, Nahano woꞌbushobozi bwoshi.
Yenyene agakasikamya imyaka neꞌmyakuula.
 
10 E Rurema! Ikyanya tugweti tugayiji kuyikumba mu nyumba yawe,
tuli mu yitoneesa hiꞌgulu lyoꞌrukundo lwawe úluyamiri ho.
11 Ukuboko kwawe kwoꞌbushobozi, kuyijwiri amiija,
niꞌziina lyawe liyijikiini hooshi.
Kyo kitumiri ugakizi yivugwa, halinde heꞌkihugo kihekiiri.
12 Abandu beꞌSayuni bakizi shambaala.
Abandu beꞌBuyuda bakizi shagaluka.
Mukuba, uyamiri ugweti ugaatwa imaaja mu kati koꞌkuli.
 
13 Emwe! Muyiji tanduula akaaya keꞌSayuni.
Mukizi genda mugakazunguluka mwo, iri munaharuura inyingo íziri ku luzitiro lwako.
14 Mukizi loleekeza ngiisi kwo bisikamiri.
Na kwakundi, munakizi yitegeereza neꞌnzitiro zaako.
Kwokwo, lyo mulonga ukuganuulira ábagaki yiji butwa kwokuno:
15 «Rurema, ali Rurema witu weꞌmyaka neꞌmyakuula.
Ye gakizi turongoora, halinde ku mberuuka.»