49
Umundu atagayama ali ho
1 Imwoꞌmwimangizi waꞌbimbi. Izaburi yaꞌbaana ba Koora.
2 Mwe bandu mweshi, muyuvwagwe yiri igambo.
Muyuvwirize bwija, kiri na mwe mutuuziri mu mahanga.
3 E bakulu na niinyu mwe bagunda, mutegage amatwiri.
E bagale na niinyu mwe bakeni, muyuvwirize mweshi.
4 Mu kanwa kaani, mugahuluka amagambo goꞌbwitegeereze,
ganali mu sobanulirana.
5 Ee! Ngamúsobanulira imigani.
Kiri neꞌsakuuzo, ngazirimbuula, mu kulasa ikinubi.
6 Niehe, kundu nangahikirwa neꞌsiku mbi,
na banangora-mabi banabe bagweti baganzokanana,
haliko ndâye yobohe.
7 Boohe, bagweti bagabiika umulangaaliro ku bugale bwabo,
banagweti bagabuyihayira bweneene.
8 Kundu kwokwo, ndaaye mundu úwangaguluula uwabo mu lufu.
Ndaanaye úwangaheereza Rurema ingwati, mbu lyoꞌmundu agenderere ukulama.
9 Si ingwati yoꞌkuguluula umundu mu lufu, iri neꞌkishingo bweneene!
Kundu angatanga ibindu katundu, bitâye kwire.
10 Ndaanaye mundu úwangagenderera ukulama imyaka neꞌmyakuula.
Si booshi bali ba kufwa naaho.
11 Bibonekeriiri kwaꞌbitegeereza bali mu fwa.
Kiri neꞌbizeeze naꞌbahwija, nabo bali mu fwa,
banasigire abandi ubugale bwabo.
12 Na kundu bâli kizi yinika amatongo amaziina gaabo,
haliko bagakizi beera mu maherero gaabo imyaka neꞌmyakuula.
Ee ma! Yago maherero, go gagaaba nyumba zaabo,
halinde ukuhisa ku bibusi byoshi.
13 Umundu, kundu angaba ali mugale bweneene,
halikago yenyene atagayama ali ho.
Si ali mu fwa naaho, nga bitugwa.
14 Yabo bahwija, kundu bangamenyekana kwo bo bali bitegeereza,
banakizi na yilangaalira,
haliko ku mbeka, bali mu fwagaga ngaꞌbandi.
15 Balyagagi nga bibuzi íbiri mu sholerwa, halinde mu shinda.
Narufu ye mungere wabo.
Iri bugaakya, ábasimbahiri Rurema bagaaba bo bakulu baabo.
Si yabo bahwija, bagaaba bakolaga hala neꞌnyumba zaabo mbamu.
Naꞌmagala gaabo, ganayame gaboliiri naaho i kuzimu.
16 Haliko niehe, Rurema agangiza mu shinda, na njubi ba mugumaana.
Ku kasiisa, yenyene agandyosa mwo.
17 Iri wangabona umundu keera agala,
anabe akoli hiiti ibindu kanyamwala, utagangaanwe.
18 Si ikyanya agaafwa, ndaahyo agatwala.
Yubwo bugale bwage, atagabugendana.
19 Ku kyanya akiri ho, kundu ali mu detwa kwo agashaniirwi,
na kundu abandu bagweti bagamúyivugiiriza hiꞌgulu lyoꞌkugenduukirwa kwage,
20 haliko agagendi gwana bashokuluza baage i kuzimu.
Yabo booshi, batâye ki bone umulengeerwe.
21 Umundu úbuziri ubwitegeereze,
kundu angaba ali mugale,
haliko ukufwa, agaafwa.
Mukuba, alyagagi nga kitugwa.