50
Mukizi yiji deta kongwa imwa Rurema
1 Izaburi ya Hasafu.
Nahano Rurema woꞌbushobozi bwoshi agweti agaadeta.
Agweti agaberangira abandu booshi ba mu kihugo,
ukulyokera isheere halinde imuga.
2 Rurema alangashiini bweneene mu kaaya keꞌSayuni.
Yako kaaya kaage nako, kabuyahiri ngana-ngana.
3 Rurema witu agayija, ataganahulika.
Umuliro guli mu jigiivya imbere lyage.
Neꞌkihuhuuta kiri mu huusa ha butambi lyage.
4 Rurema, ikyanya agaatwa imaaja zaꞌbandu baage,
agahamagala igulu neꞌkihugo, biyiji ba tumasi.
5 Agababwira kwokuno: «Keera nꞌganywana ikihango naꞌbandu baani,
ku njira yoꞌkutanga amatuulo.
Aaho! Yabo booshi, mugendi bakuumania.»
6 Rurema ye mutwi weꞌmaaja.
Kwokwo, igulu ligweti ligatanga ubumasi kwo ali woꞌkuli.
7 «E Bahisiraheeri, muli bandu baani.
Naani nie Rurema winyu.
Kundu kwokwo, mundege amatwiri, gira ndete.
Ngolaga ngatanga ubumasi bwoꞌkumúlega.
8 Iri nangaba ngweti ngamùkanukira,
kutali mbu bwo mugweti mugandangira amatuulo,
kandi iri mbu bwo muli mu kizi leeta ibitugwa byoꞌkusiriiza ha katanda kaani.
9 Emwe! Ndayifwijiri kwo munjaagize ishuuli mwiꞌruli.
Kiri neꞌmbene ziinyu, ndaki ziloziizi.
10 Inyamiishwa zooshi za mu lubako, si ziryagagi zeꞌmwani!
Kiri neꞌngaavu íziragiiri ku migazi bihumbi, ziri zeꞌmwani.
11 Ngiisi kanyuni, nyiji-nyiji ngiisi ho kali ku mugazi.
Kiri na ngiisi íbiri mu genda-genda mu mbingiro, biri byeꞌmwani.
12 Nga nangashalisiri, ndangakubwiziri.
Haliko, ikihugo na byoshi íbikiri mwo, biri byeꞌmwani.
13 Aaho! Ka utoniragi kwo ngweti ngaalya inyama zeꞌshuuli?
Kandi iri, ngweti ngaanywa umuko gweꞌmbene? Nanga, maashi!
14 Si byo ndoziizi, kwo mukizi yiji deta kongwa imwani.
Na ngiisi byo mukandagaania, mukizi bindangira.
Si nie Rurema úli hiꞌgulu lya byoshi!
15 Ku kyanya uli mu makuba, undabaaze.
Ngakukiza! Naawe unakizi ngingika.»
16 Haliko, nangora-mabi yehe, Rurema agweti agamúbwira kwokuno:
«Ewe! Kituma kikagi wangashubi deta hiꞌgulu lyeꞌmaaja zaani?
Na kituma kiki wangakizi ganuula hiꞌgulu lyeꞌkihango kyani?
17 Si ikyanya bagweti bagakuyerekeza, uli mu banegura!
Unali mu shemya amagambo gaani ha butambi.
18 Ikyanya ugweti ugaabona umuzimba,
uli mu yami múyibiika kwo.
Unali mu komeerana naꞌbashule.
19 Uyamiri ugweti ugaadeta íbitali nga byo.
Unagweti ugakizi yifunda mu bibeesha.
20 Uyamiri ugweti ugagamba mwene winyu.
Kundu ali mwene winyu ye mubutanwa,
si ugweti ugamúlega.
21 Birya byoshi, ikyanya wâli kizi bigira, nâli yihulikiiri.
Aahago! Ka kyo kitumiri ukoli toniri kwo ndi nga we?
Nanga, maashi! Si buno, ngakukanukira ngana-ngana!
Na ngulegeereze ku bweranyange.
22 «Buno, mukoli nyibagiiri.
Aahago! Yaga magambo gaani, mutee gayisaliza kwo.
Buzira kwokwo, ngamùjanganula-janganula,
ndaanaye úgaki mùkiza.
23 Ngiisi úgweti úgandangira ituulo lyoꞌkudeta kongwa,
yoyo ye mu nzimbaha.
Si nie Rurema!
Ngiisi úgakizi ngulikira, ngakizi múkiza.»