51
Amahuuno goꞌkuyilega ibyaha
1 Imwoꞌmwimangizi waꞌbimbi. Izaburi ya Dahudi. 2 Ikayandikwa ku kyanya mwami Dahudi akagira ubushule na Batisheeba, umuleevi Natani anayiji múyerekeza.
3 E Rurema! Keera nahuba bweneene. Kwokwo, ungejeerere.
Yago mahube gaani, ugahotolage.
Si indengeerwa zaawe ziri za kahebuuza!
Noꞌrukundo lwawe lutâye male.
4 Kwokwo, yago mahube gaani gooshi, ugashukage,
halinde ibyaha byani bilonge ukuyeruusibwa.
5 Amahube gaani, ngayiji bwija.
Ibyaha byani biyamiri biri imbere lyani.
6 Ikyanya nꞌgagira ibyaha, lyo nꞌgakuhubira. Ee! Ndaaye gundi ye nꞌgahubira.
Keera nagira amabi bweneene mu masu gaawe.
Ku yukwo, ikyanya ugweti ugandwira ulubaaja kwo nahuba,
bibonekeriiri kwo uli woꞌkuli.*51.6 Barumi 3.4.
7 Ukulyokera ikyanya maawe akaheeka inda yani,
yibyo byaha, byâli kola-kola mu nda yani.
Kwokwo, ikyanya nꞌgabutwa,
nâli koli tuuziri ndi munabyaha.
8 Kundu kwokwo, uloziizi kwoꞌmundu akizi tuula mu kuli.
Ku yukwo, unyigirize, mbe mwitegeereza.
9 Unyeruuse neꞌhisopo, halinde mbe mweru.
Unjuke, na mbe mweru kahengura, ukuhima ulugungu.
10 Uleke njubi shagaluka ku bushambaale.
Kiri naꞌmavuha go ukafutiiriza, nago galonge ukushambaala.
11 Yibyo byaha byani, ubiheerezagye ingoto.
Naꞌmabi gaani, ugahotolage.
12 E Rurema, we kongwa! Umbiikage mwoꞌmutima muhyahya úguyeruusiri.
Ungalulire mwoꞌmutima úgugabeera haguma na haguma.
13 Utanyimule, mbu njaage imbere lyawe.
Utanandyose mwoꞌMutima gwawe Mweru.
14 Haliko, ungizagye, halinde ndonge ukushubi shambaala.
Unambiike mwoꞌmutima gwoꞌkusimbaha, gukizi ngania.
15 Haaho, lyo ngakizi yigiriza abanabyaha ibyeꞌmwawe.
Ee ma! Ngabagalulira imwawe.
16 E Rurema, Lukiza wani! Bwo nayitana, nayikululira umwama bweneene.
Aaho! Yugwo mwama, ugunjaagize.
Kwokwo, lyo ngakuyimbira, bwo ugweti ugakizi gira íbikwaniini.
17 E Nahano, unyigulage akanwa,
halinde lyo ngizi kuyivuga imbere lyaꞌbandu.
18 Nga wangasimisiibwi naꞌmatuulo goꞌkubaagwa, njuba ngakuleetera go.
Haliko yago matuulo goꞌkusiriiza, utagaloziizi.
19 Si amatuulo go uloziizi, guli mutima úgukoli noziri.
E Rurema, umutima úgukoli noziri,
gunakoli yibiisiri haashi, utagagugayiriza.
20 E Rurema, we kongwa! Iri wangalooza,
wangagenduusa akaaya keꞌSayuni,
wanganasikamya inzitiro zaako.
21 Haaho lyaꞌmatuulo gagakizi tangwa ku njira íkwaniini.
Ee! Yibyo bitugwa binashubi siriizibwa,
halinde unabishambaalire.
Kiri neꞌshuuli zinashubi kizi tangwa ku katanda kaawe.