52
Rurema agaki hana abanabwikangaate
1-2 Imwoꞌmwimangizi waꞌbimbi. Amigirizo ga Dahudi, ku kyanya Dohegi weꞌHedoomu akagendi lega Dahudi imwa Sahuli kwo keera agenda imwa Ahimereki.
3 E ndwani ngulu, kituma kiki ugweti ugayihaya,
mbu bwo uli mu kizi gira íbitali nga byo?
Si ugweti ugayihaya ubwakya-ubwayira,
unayiteziizi ishoni imbere lya Rurema!
4 Uli mu shiiba ugashungika ukushereezania naaho.
Akanwa kaawe kagweti kagakera nga higembe hyugi.
Unagweti ugakizi deta ibibeesha ngiisi kyanya.
5 Ho wangakunda amiija, ukoli kuuziri amabi naaho.
Na ho wangakunda ukuli, ukoli kuuziri ibibeesha.
6 Si ufitiirwi naaho ku magambo goꞌkushereezania,
unayamiri uli mu beesha!
7 Ku kasiisa, Rurema agakunyanyaga haashi,
utanâye yinamuke.
Agakulyosa mu kaaya kaawe, anakulashe imbuga.
Agakushikula mu bagumaana, unagendi beera mu bafwiri.
8 Yibyo byoshi, ikyanya abandu bagabibona, bagayoboha Rurema.
Ha nyuma, banakushekeereze kwokuno:
9 «Honyo! Uyu mundu, lolagi íbyamúkoleka kwo.
Si atâli loziizi ukuyegamira Rurema!
Agweti agayihega ku bugale bwage naaho.
Âli loziizi ukuba kihagarusi, mu kukizi shereezania.»
10 Haliko, niehe ndi ngeꞌkiti kyoꞌmuzehituuni,
íkimeziri mu nyumba ya Rurema.
Mbiisiri umulangaaliro gwani ku rukundo lwage,
bwo luyamiri ho imyaka neꞌmyakuula.
11 E Rurema, bwo uli mwija, ngakizi kubiika kwoꞌmulangaaliro.
Na bwo ugweti ugakizi tabaalana,
ngakizi kuyivuga imyaka neꞌmyakuula.
Ee! Ngakizi kuhuuza imbere lyaꞌbandu baawe bataluule.