54
Nahano agakizi nzikamya
1-2 Imwoꞌmwimangizi waꞌbimbi. Lulasibwe neꞌnanga zeꞌmirya. Ludesiri hiꞌgulu lyeꞌkyanya Abaziifu bakagendi bwira Sahuli, ti: «Si Dahudi abishamiri ha kati kiitu.»
3 E Rurema, umbulanire ku bushobozi bwawe,
unangize kwiꞌziina lyawe.
4 Uyuvwirize amahuuno gaani, we kongwa.
Undegage amatwiri.
5 Si ibinyamahanga bigweti bigandeera!
Balyagagi balangi bweneene, banaloziizi ukunyita.
Yabo bandu, batatwaziizi Rurema.
6 Kundu kwokwo, Nahano Rurema agandabaala.
Yenyene, agakizi nzikamya.
7 Ngiisi ábagweti bagambangaaniza,
ubasheregeze mu mabi gaabo boonyene.
Ugirage nga kwo ukalagaania, mu kubaminika.
8 E Nahano, ngakizi kutangira ituulo ku mutima úgushenguusiri.
Nganakizi yivuga iziina lyawe, bwo liri liija.
9 Mukuba, keera ukangiza mu makuba gaani gooshi.
Kiri naꞌbagoma baani, nanabonaga ngiisi kwo bahimwa.